بهشتی آختارانلار و جهندمدن قاچانلار

	بهشتی آختارانلار و جهندمدن قاچانلار
ایمام علی (ع) نهج‌البلاغه‌ده بویوروبلار: دونیانین اوزو گئتمکده‌دیر و ویداع آهنگینی چالیر و آخیرتین اوزو گلمکده‌دیر. بیلین کی بویون آتلاری حاضیرلاماق گونودور و صاباح موسابیقه گونو. کیم قاباغا دوشرسه بهشت اونوندور, و هر کیم دالی‌یا قالیرسا, اونون یئری اود اولاجاق. کیمسه یوخدور کی اؤلومو چاتمامیش اؤز خطاسیندان توبه ائده؟ کیمسه یوخدور کی بدبختلیکدن قاباق اؤزونه بیر ایش گؤره؟ بیلین کی سیز عؤمور گونلرینده اومیدلر و آرزولاردا بوغولورسوز, بیر حالدا کی اؤلوم سیزین آرخازدا کمین قوروب. هر کس بو گونلر و اؤلوموندن قاباق اؤزونه بیر ایش گؤره, عملی اونا فایدا وئره‌جک و اؤلومو اونا ضرر وورمایاجاق و هر کس کی بو گونلر کمکارلیق ائده و اؤزو اوچون بیر ایش گؤرمیه, عملی‌نین فایداسی اولماییب اؤلومو ضرر ووراجاق. وحشت و قورخو گونونده اولدوغو کیمی امنیّتده و آساییشده ده آللاه ایشینه قوشولون. بیلین کی من بهشته تای بیر شئی گؤرمه‌میشم کی اونو آختاران غفلت یوخوسوندا یاتسین و جهنم کیمی بیر شئی گؤرمه‌میشم کی اوندان قاچان, قاچماق و اؤزونو قورتارماق یئرینه راحات یوخویا گئتمیش اولسون. بیلین کی هر کس اؤز حقّیندن فایدا آپارمایا, باطیل اونا ضرر یئتیرر و کیمسه کی هیدایتله دوز یولا گئتمیه, ضلالت اونو اؤلدورر. بیلین کی سفر یوکونو باغلامالیسیز و سیزه دئییبلر کی سفر یوکوز نه‌دیر و هاردادیر! سیز اوچون ایکی شئیدن قورخورام: بیر نفسین ایستکلری‌نین دالیسیجان گئتمک و او بیری باشدا اوزون آرزولار بئجرمکدیر. بو دونیادا, ائله بو دونیادان توشه گؤتورون کی صاباح او بیری دونیادا اؤزوزو موجازاتدان قورتاراسیز.

موسلمانلارین ایسلاما گؤره درین گیراییشلری و غربین چالیشماسی

موسلمانلارین ایسلاما گؤره درین گیراییشلری و غربین چالیشماسی

موسلمانلارین ایسلاما گیراییشلری, مودئرنیته‌نین تأثیری آلتیندا قالمادی و بیر حالدا کی غرب اؤلکه‌لری‌نین چوخوندا کلیسالار باغلانیر, همن اؤلکه‌لرده چوخلو موسلمان ناماز جومعه‌ده حاضیر اولورلار و دیقّته لاییق معنویّتی نوماییشه قویورلار. غربلی‌لرین ایسلاما گؤره منفی باخیشلاری‌نین تاریخی, اونلارین ایسلاملا جیدّی صورتده اوزلشماقلاری گونلره قاییدیر. بو اوزلشماق ایکینجی عصرده و او گونون ایسپانیاسیندا باش وئردی و اونلارین ذهنینده ناقیص و ایشتیباه بیر تصویر یاراتدی. نظره گلیر کی یهودیلر و مسیحیلرین, دوز معلوماتلاری اولمایان چوخ گوجلو آیری بیر دینله اوزلشماقلاری, ایسلام ظهوری‌نین ایجتیماعی و سیاسی ویجهه‌سی‌نین جیدّی اولماسیندا موهوم رول اوینور؛ کی البته قورآنین بویوردوغونا گؤره بو مسأله‌ده یهودیلر داها آرتیق خصومت و دوشمن‌چیلیک نیشان وئردیلر. طبعاً تانیشلیغین اولماماسی و اوندان علاوه اؤزونو یوخاریدا و اوستون گؤرمک بئله بیر دوشونجه یاراتدی کی مسیحیّتدن یوخاری معنویّت و دوشونجه اولا بیلمز. ائله بونا گؤره اونلار بئله دوشونورلر کی ایسلام غیر موستقیل بیر دین و فقط مسیحیتین نامربوط و بدل نوسخه‌سیدیر. ایسلامدان قورخو کی اونون جذابیّتی و منطیقی قارشیسیندا, بیر جور خباثته آلوده اولموشدو باعیث اولدو پیغمبرین (ص) زوجه‌لری‌نین چوخلوغو کیمی بعضی خصوصیّتلرینی بهانه ائدیب و بو زاویه‌دن اهانتله قاریشیق اینتیقادا ال وورالار. کارن آرمسترانگین muhammad a biography of the prophet آدیندا بیر کیتابی وار کی مسیحیّتین ایسلاملا ایلک اوزلشمه‌سی و او زمان پیغبره(ص) ائتدیکلری توهینلر باره‌ده بیر گوزاریشدیر. غالیبی موسلمانلار اولان صلیبی جنگلرده, ایسلام و مسیحیّتین سیاسی اوزلشمه‌لرینده, کلیسا اربابی موسلمانلارا نیفرتین چوخالماسی یولوندا چالیشمالاری, اوروپانین عثمانلی ایمپراتورلوغو طرفیندن اوزون مودّت تهدیدی (ائله کی بیر مقطعده ایمکانی واریدی اوروپانین بوتونلویو عثمانلی طرفیندن فتح اولا), اوروپالیلار ایچینده موسلمانلارا نیسبت بیر جور قورخو یاراتدی. ایسلامین ظهوری کلیسانین اوروپایا حاکیم اولدوغو اورتا عصرلرده باش وئردی. طبیعتاً هر دین کی بو مسیحیتین قارشیسیندا باش قالدیرسا ایدی بیر رقیب کیمی تانیناردی کی گرک منطیق و ایستیدلال یولیله و بونلار جواب وئرمه‌سه توهین و گوجله, او دین میداندان قوغولسون. آما کلیسا کی منطیق و عقل یولیله ایسلام قارشی‌سیندا دایانا بیلمه‌دی, قاباغا گئتدیکجن بو موقابیله‌یه سیاسی رنگ وئردی و اونو اوروپالیلارین ذهنینده بیر تاریخی ذهنیّته چئویردی. البته بو ذهنیّت یایقین و هامی اوچون دئییل. علم و موطالیعه اهلی اولانلار, واقعیّتلردن خبرلری وار. غرب دونیاسیندا یاشایان موسلمانلارین چوخو اصالتاً غربلی‌دیلر و بو موسلمانلارین تکجه بیر بؤلومونو موهاجیرلر تشکیل ائدیر. اولا بیلر 50 ایله‌دک اوروپالیلارین بؤیوک قیسمینی موسلمانلار تشکیل وئرسینلر. غربلیلر ایندیدن فیکره دوشوبلر کی موسلمانلارین حساسیّتینی آزالتسینلار و پیغمبرین(ص) شخصیّتینه توهین ائله‌مکله اونو سیندیرسینلار کی بلکه بو گئدیشین قارشیسی آلینسین.

ایسلام دونیا گؤروشونده خانیملارین مقامی

ایسلام دونیا گؤروشونده خانیملارین مقامی

ایسلام فلسفی نظردن و خیلقتین تفسیرینده خانیما تحقیر گؤزو ایله باخمیر و بوجور نظریه‌لری ردّ ائدیر. تاریخ بویو آروادلارا ظولم اولاندان سونرا و اونلار کولفتلیگه چکیلندن سونرا, ایسلام گونشی پارلاماغا باشلادی و اونا عادیلانه حقلر وئردی و اونا اولان ظولملری اوندان اوزاقلاتدی. آروادی اسارتدن قورتاردی و اونونلا اینسانی و یاراشان رفتار ائتدی. ایسلام اون‌دؤردونجو عصرده موسلمان خانیما یاشاماق, ایرث آپارماق, مالکیت و تعلیم حقّی باغیشلادی. آما مخلوقاتین گله‌جگینه حکیم اولان آللاه بویورور: کیشیلرین آروادلارا نیسبت تسلّوطی واردیر اونا گؤره کی آللاه بعضیلرین بعضیلره اوستون ائدیب و هم اونا گؤره کی کیشیلر اؤز ماللاریندان آروادلارا نفقه وئره‌لر. عین حالدا آللاه تعالا بویوروب: کیشی و آرواد بیر جینسدندیلر و آرالاریندا تقوا و یاخشی عمللردن سونرا فرق یوخدور. آللاه هئچ بیر‌ی‌نین عمللرینی ضایع ائله‌مز. قورآن آدامین (ع) بهشت ناغیلینی دئییر, آما هئچ‌واخت دئمیر کی شیطان و یا ایلان حوّانی و سونرا حوّا آدامی توغلادی. قورآن نه حوّانی اصلی گوناهکار تانیتدیریر و نه اونو حسابدان چیخاردیر. بئله‌لیکله قورآن راییج اولان غلط بیر فیکیرله موباریزه ائدیر و بو معنا ایله کی آرواد بالاجا شیطاندیر موباریزه ائدیر. ایسلام صراحتله دئییر کی یئر-گؤی, بولوت و یئل, بیتکی و حیوان هامیسی اینسان اوچون یارانیب. ایسلام دئییر آرواد و کیشی بیر بیرلری اوچون یارنیب. آروادلار سیزین بزک و اؤرتوکلریز و سیز اونلارین بزک و اؤرتوکلریسیز.

ایشلرین ایداره ائتمه‌سینده‌ حضرت علی‌نین حیکمتی ! * حکمة الامام

	ایشلرین ایداره ائتمه‌سینده‌ حضرت علی‌نین حیکمتی ! * حکمة الامام علی فی إدارة الأمور !
بیر گون ایمام علی‌یه (ع) خبر یئتیشیر کی عامیللری‌نین بیری هدیه قبول ائدیب (روشوه یوخ) پس اونا بیر مکتوب یازیر و اوندا اونا دئییر کی سن او هدیه‌نین شوبهه‌لی اولدوغون بیلرکن آلمیش اولسان, پس سن آخماقسان و اگر اونون شوبهه‌لی اولماسیندان خبرین اولمادیسا پس سن جاهیلسن و آخماق و جاهیل آدامین حؤکومت ائتمگه لیاقتی یوخدور, سونرا حضرت اونون عزلینه امر ائله‌دی . . . حکمة الامام علی فی إدارة الأمور ! بلغ مرة الامام علی بن ابی طالب کرم الله وجهه أن أحد عماله قد قبل هدیة (لیس رشوة) فأرسل الیه کتابا یقول فیه ان کنت قبلتها عن علم بشبهتها فأنت (أحمق) وأن کنت قبلتها عن جهل بذلک فأنت (جاهل) ولایجدر بأحمق أو جاهل ان یحکم , ثم قام بعزله ...

یئرین جنوبی یاریم کوره‌سی‌نین لاپ بؤیوک مسجیدی تیکیلدی

یئرین جنوبی یاریم کوره‌سی‌نین لاپ بؤیوک مسجیدی تیکیلدی

جنوبی آفریقانین «میدراند» شهرینده یئرین جنوبی یاریم کوره‌سی‌نین لاپ بؤیوک مسجیدی 55 مترلیک میناره‌ایله تیکیلدی. المنار شبکه‌سی‌نین وئردیگی خبره گؤره, جنوبی آفریقانین اَن بؤیوک مسجیدی کی تورک سرمایه‌قویانلارین حیمایتی ایله دوزلیب, کئچن پنجشنبه آچیلدی. جنوبی آفریقانین «میدراند» شهرینده دوزلمیش بو مسجید, ایسلامی بیر موجتمعین اورتاسیندا دوزلیب و بیر 55 مترلیک میناره‌سی وار و ائله بونا گؤره یئرین جنوبی یاریم کوره‌سی‌نین اَن بؤیوک مسجیدی تانینیب. بو مسجیدین گونبذی‌نین قوطری 24 متردیر و 16-جی قرنده تورکیه‌نین «ادرین» شهرینده تیکیلمیش «سلیمانی» مسجیدین اولگوسی ایله تیکیلیب. جنوبی آفریقانین اَن بؤیوک مسجیدی‌نین تیکیلمه‌سی 3 ایل چکدی و ایقتیصادی پایتخت اولان ژوهانسبورگ شهری و سیاسی پایتخت پرتوریا آراسیندا یئرلشیب. بو مسجیدین یئرلشدیگی موجتمعین مدرسه, ورزشی میدانلار و هابئله بیر مریض‌خاناسی وار کی نلسون ماندلانین حیمایتی ایله دوزلیب. جنوبی آفریقانین رئیس جومهوری جاکوب زوما بو مسجیدین آچیلیشندا دئدی کی بو مسجیدین تیکیلمه‌سی دینلر آراسیندا آنلاییشا کؤمک ائده‌جک. جنوبی آفریقا مسیحی بیر اؤلکه‌دیر کی  50 میلیون جمعیتی‌نین فقط 650 مین نفری موسلماندیر.

اؤلندن سونرا وادی‌السلام قبریستانیندا گؤروشریک

	اؤلندن سونرا وادی‌السلام قبریستانیندا گؤروشریک
وادی‌السلام قبریستانی بقیع و ابوطالب قبریستانیندان سونرا دونیا موسلمانلاری‌نین اَن موهوم قبریستانیدیر. ریوایتده گلیب کی مؤمینلرین روحلاری اؤلندن سونرا اورا مونتقیل اولار و دسته-دسته بو قبریستاندا بیر-بیرلریله دانیشار. وادی‌السلام قبریستانی بقیع و ابوطالب قبریستانیندان سونرا دونیا موسلمانلاری‌نین اَن موهوم قبریستانیدیر و خاص موقدّسلیگی واردیر. اورا بیر یئردیر کی ریوایتلره گؤره مؤمینلرین روحلاری اؤلندن سونرا اورا اینتیقال تاپار و اوردا دسته-دسته بیر-بیریله دانیشار و بؤیوک قیامته‌جن اوردا قالار. بو قبریستان جنوبدان ایمام علی‌نین (ع) موطهر حرمینه و نجف-کوفه‌نین اصلی خیابانینا (شارع علی بن ابیطالب), شرقدن نجف – کربلا جادّه‌سینه, شیمالدان حی المهندسین منطقه‌سینه و غربدن سابیق نجف دریاسینا دایانیر. ایمام صادق (ع) بو قبریستانلیق باره‌ده بویوروب: هر مؤمین کی غربده و شرقده دونیادان گئدیر, آللاه اونون روحونو وادی‌السلاما مونتقیل ائدیر. دئیه‌سن گؤرورم مؤمین اینسانلار دسته-دسته بیر-بیری‌نین یانیندا اوتوروب دانیشیرلار. بؤیوک پیغمبرلرین پاک مزاری بو قبریستانلیقدا بللی‌دیر. ایمکانی وار آیری پیغمبرلر ده اوردا اولسونلار آما حضرت هود و حضرت صالح پیغمبرین مزاری قبریستانین اوّلینده گونبذ آلتیندا بالاجا بیر اوتاغین وسطینده یئرلشیب. بحارالانواردا گلیب کی حضرت نوح و ابراهیمین (ع) و حدوداً 370 پیغمبرین قبرلری ایمام علی‌نین (ع) مزاری کناریندا یئرلشیب.

دین اینسانین سعادت یولودور

	دین اینسانین سعادت یولودور
علمین سولطه‌سی و اوندان اله گلن نتیجه‌لر گؤرستدی کی علمه ایفراطی تأکید ائله‌مکله اینسانین سعادتینه یئتیشمک اولماز. کئچمیش زمانلارا مخصوصاً اؤز عصرمیزه باخیش سالساق گؤره‌ریک کی دین اینسانین معریفت منبعی کیمی قیراغا قویولوب. قاباقلار دیندن ایستیخراج اولان اصوللارین چوخو آیری منبعلردن آلیندی و عاغیللا مونافاتی اولان اصول قیراغا قویولدو. چوخلو دینه باغلی اولان ایناملار او جومله‌دن دونیانین  یارانما باره‌ده اولان ایناملار علمله سوآل آلتینا گئتدی. اعتبارلی اولان تکجه علمی یوللاری ایدی. ائله بو اساسدایدی کی تکامول, خیلقت و یارانمانین یئرین توتدو و اونو اعتیبارسیز ائله‌دی و علمی شواهید وارلیغین یارانماسی‌نین منبعی باره‌ده دینی باخیشلاری ایشتیباه حسابلادی. آما علمه ایفراطی صورتده تأکید ائله‌مگین نتیجه‌لری‌ده بللی اولدو. بو دوران ائلیه بیلمه‌دی دینی اینام و اعتیقادلاری آرادان آپارسین. علمین سولطه‌سی و اوندان اله گلن نتیجه‌لر گؤرستدی کی علمه ایفراطی تأکید ائله‌مکله اینسانین سعادتینه یئتیشمک اولماز. دوز یول بودور کی هر ایکی موضوعیا دیقّت اولسون و اونلاردان ایستیفاده ائدیلسین.

«خیلافتین مشروعیت بؤحرانی» مأمونون ایمام رضانی(ع) ولیعهد ائتمه‌س

«خیلافتین مشروعیت بؤحرانی» مأمونون ایمام رضانی(ع) ولیعهد ائتمه‌سی‌نین اصلی عامیلی

مأمونون ایمام رضانی(ع) ولیعهد ائتمه‌سی‌نین عامیلی اونون شیعه گیراییشیندن یوخ بلکه مؤتزیله اولماسینا گؤره ایدی کی اونو مشروعیت بؤحرانینا دوچار ائله‌میشدی و دئیه‌سن بو بؤحران ایمام رضانین (ع) شهادتیندن سونرا حل اولور. ویلایت عهدلیگین مأمون طرفیندن ایمام رضایا (ع) وئریلمه‌سی‌نین سببلری باره‌ده اوچ فرضیه مطرح ائدیبلر: بیرینجی بو کی مأمون جیدی سیاسی انگیزه‌ایله صحنه‌یه گلمیشدی و علوی‌لرین شوریشلری کیمی بیر پارا موشکوللرین حلی اوچون بو ایشه ال وورموشدو. ایکینجی فرضیه کی چوخ آز عیده‌نین طرفیندن مطرح اولور بودور کی مأمون بو مسأله‌ده جیدی سیاسی انگیزه‌سی یوخیدی, بلکه اونون شیعی تعلوقاتی واریدی و ایمام رضایا (ع) علاقه‌سی اولدوغو اوچون بو ایشه ال وورموشدو. اوچونجو فرضیه بودور کی مأمون چوخ شیدّتلی حالدا مؤعتزیله دوشونجه‌سینه اعتیقادی واریدی و بونا گؤره خیلافتی‌نین مشروعیتینده بؤحران واریدی. ایمام رضا (ع) زمانیندا اوچ فیکری-سیاسی جریان واریدی. بیرینجی جریان شیعه ایمامتی ایدی کی «دینی دوشونجه‌«یه دایانیردی و بو جریان پیغمبر (ص) زمانی جوجَریب  سقیفه جریانیندا اصولی قورولدو و ایمام علی‌نین (ع) قیسا خیلافتی عهدینده ایدئولوژی صاحیبی اولدو و حسینی عاشورادا موستقیل هویّت تاپدی و بو زماندا ایمام رضا (ع) بو جریانین نوماینده‌لیگینی ائدیردی. ایکینجی جریان «سونّتلره دایانماق» دوشونجه‌سی ایدی کی ایمامتی ایجتیماعی بیر ایش بیلیردی و سونّت اهلی بو دوشونجه‌نی تابعیت ائدیردیلر. اوچونجو فیکری جریان «عقله دایانان» مؤعتزیله جریانیدی کی نه شیعه‌ایله و نه اهل سونّتله موافیق ایدی و ایمامتی, اینسانی عقله تابع بیلیردی و بئله اینانیردی کی ایمام, اینسان عقلی  و اخلاق, سیاسی و ایجتیماعی معیارلار اساسیندا سئچیلمه‌لیدیر. ایمام رضانین (ع) عصرینده بو اوچ جریانین داعواسیندا مأمون اؤز خیالیندا چالیشیردی ان یاخشیسینی سئچسین. او مؤعتزیله دوشونجه‌سینه گیراییش تاپیب و جیدّی صورتده بؤحرانا دوشموشدو و بو بؤحران, مشروعیت بؤحرانی‌ایدی و شاید او اؤز-اؤزونه فیکیرلشیردی کی آیا ایمام رضا(ع) کیمی شخصین اولماسی‌ایله یئنه او ایمامت ایدعاسی ائده بیلر یا یوخ؟ ایمام رضانین(ع) شهادتیندن سونرا بو بؤحران حل اولور و مأمون اعتیزالدان ال چکیر و معتصمی اؤزونون یئرینه سئچیر. مأمون نه شیعه ایدی و اهل سونّتین ایناملارین قبول ائدیردی و خیلافت اوچون هئچ شرط-شروط قاییل دئییلدی. مأمون مؤعتزیله‌لرین عقل محور اینامیله چالیشیردی مشروع بیر حکومت تشکیل وئرسین کی باشارا بیلمه‌دی.

آیت الله علامه محمد تقی جعفری + مجموعه سخنرانی

	آیت الله علامه محمد تقی جعفری + مجموعه سخنرانی
آیت الله علامه محمد تقی جعفری اوستاد علامه محمد تقی جعفری(ره) نین یاشاییشیندان خولاصه اوستاد علامه محمد تقی جعفری(ره) 1304-جو ایلده تبریزده دونیایا گؤز آچدی و تبریز، تهران، قوم و نجف اشرف شهرلرینده ایسلامی علملرین عالی تحصیلاتیندان سونرا بؤیوک عالیملرین محضرینده او جومله دن آیات عظام، میرزا فتاح شهیدی، شیخ محمدرضا تنکابنی، شیخ کاظم شیرازی، سید عبدالهادی شیرازی، سید ابوالقاسم خویی و سید محسن حکیم کیمی بؤیوکلردن فئیض آپاردی. ایندیه کیمی اوستادین اثرلریندن 80 اثر چاپ اولونوب و اونلارین بعضیسی نین چاپی مثنوی شرحی کیمی کی 15 جیلدده نئچه دفعه تجدید چاپ اولوب. هابئله اونلارین نیظارتی آلتیندا 12 ایل بویوندا مولانا مثنویسی نین کشف الآیاتی 4 جیلدده «دریادان دریایا» عونوانیندا یایلیبدیر. اوستادین گؤرکملی اثرلریندن نهج البلاغه شرح و تفسیریدیر کی 27 جیلدده چاپ اولوب. اوستاد جعفری نین آیری نفیس اثری مولانانین دوشونجه لری، شرق و غرب جهانبینی و فلسفه لری نن موقاییسه سی زمینه سینده دیر کی «مولانا و جهانبینی لر» عونوانیندا چاپ اولوب. اینسان حاقلاری و اونون ایسلامدا اولان اینسان حاقلاری نن موقاییسه سینده، موفصّل و شرحلی کیتاب اوستادین قلمی اینن مونتشیر اولوب کی اونون تازا نظرلری ایسلامی کونفرانسدا مطرح و ایستیفاده اولوب. بو کیتاب اینگیلیسی دیلینه ترجومه و چاپ اولوب و ژاپونی دیلینه ده ناکویا دانیشگاهین اوستادلاری نین بیرینین الیله ترجومه اولماقدادیر. اوستاددان 60 دان آرتیق کیتابیدا هله چاپ اولماییب و گله جاقدا چاپ اولاجاق. کی بو ترتیب اینن چاپ اولمامیش اثرلری 150 عونوان اولور. اوستادین کیتابلاری بو زمینه لرده دیلر: فیقه ، سیاسی علملر ، روانشیناسی، تربیتی علملر ، ایسلامی معاریف، ایسلامدا هونر و گؤزللیک نظریه سی، فلسفی و کلامی بحثلر کی دولودور تازا و بدیع نظریه لری نن. دونیانین باشا باشیندان اونلارجا اوستاد و دوشونجه صاحیبلری اوستاد جعفری نن علمی موذاکره لری واریدی کی بو دانیشیقلارین 50دن چوخو 2 جیلد کیتابدا «دوشونجه لر تکاپوسو» آدیندا یاییلیب. علامه جعفری نین دانیشیقلارین بو لینکلردن دانلود ائده بیلرسیز: علامه جعفری نین تورک دیلینده دانیشیغی  41 مگابایت اینسانین گؤزللیگی و روحانی شخصیتی موختلیف زمینه لرده دانیشیقلار 1  260 مگابایت 2  250 مگابایت 3  240 مگا بایت 4  265 مگابایت 5  113 مگابایت 6   131 مگابایت

ایسلام ضیدینه اولان بو حرکتلر, دونیا اهلی‌نین موسلمان اولماسی‌نی

	ایسلام ضیدینه اولان بو حرکتلر, دونیا اهلی‌نین موسلمان اولماسی‌نین قاباغین آلماغا گؤره‌دیر
غربلیلرین ایسلاملا موباریزه‌سی بونا خاطیردیر کی همیشه نیگراندیلار مسیحی و یهودیلر ایسلاما اوز گتیرسینلر و ایسلام ضیدینه اولان بو حرکتلر, دونیا اهلی‌نین موسلمان اولماسی‌نین قاباغین آلماغا گؤره‌دیر. غرب دونیاسی‌نین ایسلاملا موباریزه‌سی, فیکری نظردن قرنلر قاباغا قاییدیر و ریشه‌سی یهودیتله مسیحیتین ایسلاملا ضیدّیتینه یئتیشیر. حقیقتده بو ضیدیت بو نیگرانچیلیقدان چیخیر کی اولمایا یهودیلر و مسیحیلر موسلمان اولسونلار. توهین ائدن فیلیمده بو مسأله اساس هدف توتولوب. بونلارین ایشلتدیکلری یول ایسلامین تاریخ و مفهوملارینی تحریف ائله‌مکدیر و بو یولدا, تاریخ بویو چالیشیبلار کی ایسلامی خشین و شمشیرله یاییلمیش دین تانیتدیرسینلار و بئله ایلقا ائده‌لر کی ایسلامی تعلیمات موسلمانلاری غیری اینسانی حرکتلره وادار ائدیر و ائله بو فیلیم‌ده ایستیر ایلقا ائله‌سین کی موسلمانچیلیق خشونت و غیری اینسانی رفتار صاحیبی اولماق دئمکدیر. هرچند کی غربین موستشریقلر و ایسلام شیناسلاری چالیشیبلار کی بیر سئری ایسلامی مفهوملاری تحریف ائله‌سینلر و غیری موناسیب صورتده ایرائه وئرسینلر و میثال اوچون ایسلامدا اولان جهاد مفهومونو منفی تفسیر ائله‌سینلر. آما هر زمان کی موسلمان عالیملرین یازیلاری اونلارین یازیلاری‌نین کناریندا قویولدو ایدعالاری‌نین فایداسیز و بوش اولدوغو بللی اولدو. اونلار همیشه چالیشیبلار پیغمبر اکرمین (ص) شخصیتینه حمله ائله‌سینلر و موبارک وجودی رحمةللعالمین اولان او حضرته, اهانت ائدیب تاریخ و سیره‌سینی تحریف ائله‌سینلر. بو فیلمده‌ده بو ایش لاپ کیفیر صورتده و اینسانی و ایسلامی معیارلاردان کنار, مطرح اولوب. ائله کی بو فیلمده پیغمبره (ص) نیسبت وئریلمیش عمللر هئچ کرامتلی اینسانا یاراشان دئییل. غرب چالیشیر ایسلام مفهوملاری و تاریخینی منفی گؤرستمکله اؤز خیالینا خالیص ایسلامین دوشونجه‌سی‌نین یاییلماسی‌نین قاباغین آلسین. بو چالیشمالار ایندی چوخ آیدین آشکار گؤرونور و اگر بوندان قاباق شیطانی آیه‌لر کیتابی لفّافه‌سینده پیغمبره بو نیسبت وئریلیردی کی نعوذ بالله او حضرت وحی آلاندا شیطانین‌دا تلقینلرین آلیردی, ایندی ایش او یئره یئتیشیب کی آشکار صورنده او حضرته  لاپ کیفیر نیسبتلر نیسبت وئریلیر.

ایمام صادقین (ع) دونیا و آخیرت موریدینده دؤرد نصیحتی

	ایمام صادقین (ع) دونیا و آخیرت موریدینده دؤرد نصیحتی
ایمام صادق (ع) اینسانین نعمتلر موقابیلینده غفلتی باره‌ده بیر حدیثده بویورور کی آللاه سنه نعمت وئردی و اؤرگتدی کی اوندان نئجه ایستیفاده ائده‌سن, آما سن همیشه بونلاری بیر-بیری‌نین اوستونه قالیرسان. یئری وار آللاه تعالا دئیه کی سنه وئردیگیم بو قدر نعمتی نه ائدیرسن؟ رُوی أَنَّهُ جَاءَ رَجُلٌ إِلَی الصَّادِق (ع) فَقَالَ لَهُ:«بِأَبِی أَنْتَ وَ أُمِّی یَا ابْنَ رَسُولِ اللَّهِ عَلِّمْنِی مَوْعِظَةً فَقَالَ لَهُ علیه السلام إِنْ کَانَ اللَّهُ تَبَارَکَ وَ تَعَالَى قَدْ تَکَفَّلَ بِالرِّزْقِ فَاهْتِمَامُکَ لِمَا ذَا وَ إِنْ کَانَ الرِّزْقُ مَقْسُوماً فَالْحِرْصُ لِمَا ذَا وَ إِنْ کَانَ الْحِسَابُ حَقّاً فَالْجَمْعُ لِمَا ذَا وَ إِنْ کَانَ الثَّوَابُ عَنِ اللَّهِ حَقّاً فَالْکَسَلُ لِمَا ذَا» بیر ریوایتده گلیب کی بیر شخص ایمام صادقین (ع) محضرینه گلیب عرض ائدیر: یا بن رسول‌الله آنا-آتام سنه قوربان اولسون! منه بیر نصیحت وئر! «بِأَبِی أَنْتَ وَ أُمِّی یَا ابْنَ رَسُولِ اللَّهِ عَلِّمْنِی مَوْعِظَةً»، حضرت بویوردو: اوّل؛ «إِنْ کَانَ اللَّهُ تَبَارَکَ وَ تَعَالَى قَدْ تَکَفَّلَ بِالرِّزْقِ فَاهْتِمَامُکَ لِمَاذَا» آللاه روزی‌نین ضامینیدیر و دئییب: سنین روزینی ضمانت ائدیرم و اونو سنه چاتدیریرام؛ پس نه اوچون غوصّه یئییرسن؟ بیر اوشاق کی آتاسی اونون روزی‌سینه ضامین اولوب, روزی غوصّه‌سی یئیَر؟ او دئیر: آتام خرجیمی وئریر, داها غوصّه‌نین معناسی یوخدور. غوصّه یئسه, دلیدیر. اولار کی بیر آتانین الی بوش اولسون, آما هر شئی بو آتانین الینده‌دیر. ایکینجیسی ؛«وَ إِنْ کَانَ الرِّزْقُ مَقْسُوماً فَالْحِرْصُ لِمَاذَا»، ریزقی پایلایان, رزّاق اؤزو اولسا و سن اونو آزالدیب چوخالدا بیلمه‌سن, نیه حیرص یئییرسن؟ اوچونجوسو؛ «وَ إِنْ کَانَ الْحِسَابُ حَقّاً فَالْجَمْعُ لِمَا ذَا»، قیامت گونون حسابی حقّ اولسا, نیه بو قدر آنبار ائلیرسن؟ حضرت حسابین فقط حلالی‌نین صؤحبتین ائلیر, «فی حلالها حساب» و حرام موریدینده کی عیقابی وار بحث ائله‌میر. دئییرلر کی بهلول ساجی اود اوستونه قویاردی و داغلاناندان سونرا چیخاردی ساجین اوستونه و بئله دئیردی: بهلول, جوببه, آرپا چؤرگی و سیرکه. سونرا آتیلاردی یئره. اوندان سوروشدولار: نیه بئله ائدیرسن؟ دئدی: چونکی دئییرلر قیامت چؤلونون یئری داغلانمیش اولار. قیامت گونو اوچون تمرین ائدیرم کی نه قدر تئز حسابیمین جوابینی وئرسم آیاغیمین یانماسی آز اولاجاق؟ دؤردونجو؛ «وَ إِنْ کَانَ الثَّوَابُ عَنِ اللَّهِ حَقّاً فَالْکَسَلُ لِمَاذَا»، اگر ایطاعتین قیبالیندا آللاهین وئردیگی پاداش حقّدیر و بو پاداش قیامت گونو وئریله‌جک, پس نیه آللاهین ایطاعتینده سوستلوق ائدیرسیز؟ بیر حالداکی تله‌سمک لازیمدیر و گرک تنبللیگی و سوستلوغو کنارا قویاسیز.

خندق ساواشیندا حضرت علی‌نین (ع) فداکارلیغی

خندق ساواشیندا حضرت علی‌نین (ع) فداکارلیغی

حضرت علی(علیه السلام) بو جنگده دوشمن قهرمانلاری‌نین قاباغین آلماسایدی و یا بو یولدا شهید اولسایدی, دوشمن سربازلاری‌نین خندقدن کئچمه‌سی راحاتلاشاردی و دوشمنین سیپاهی ایسلام قوشونونا هجوم ائلردی و نتیجه‌ده موشریکلر غالیب اولاردیلار. هیجرتین بئشینجی ایلینده شوالین 17-ده خندق غزوه‌سی باش وئردی. بو غزوه‌ده دوشمنین قوشونو چوخ و موجهزیدی. موشریکلر مدینه شهرینی اوزون مودّت اوچون موحاصیره‌یه سالدیلار و موسلمانلارین فداکارلیقلاری و آللاهین کؤمگی ایله دوشمن مغلوب اولدو و موسلمانلار بو جنگدن باشی اوجا چیخدیلار. قریش قهرمانی قاباغیندا دایانان جوان کیشی آیت‌الله جعفر سبحانی «ویلایت فروغی» کیتابیندا احزاب جنگی‌نین باشلانیشی شرحینده بئله یازیر: هر دفعه کی عرب قهرمانی «عمرو بن عبدود» موباریزه اوچون آیاغا قالخیردی, موسلمانلاردان فقط بیر جوان دوروب میدانا گئتمک اوچون پیغمبردن ایجازه ایستیردی. آما هر دفعه پیغمبر موخالیفتچی‌لیک ائدیردی. او جوان حضرت علی‌ایدی(علیه السلام) و پیغمبر اونون جوابیندا بویوروردو: اوتور بو «عمرو»دیر! «عمرو» اوچونجو دفعه اوچون باغیردی و دئدی: قیشقیرماقدان سسیم توتولدو, سیزدن بیر نفر یوخدور کی میدانا گله؟ یئنه بو دفعه حضرت علی (ع) پیغمبره یالواردی کی اونا موباریزه ایجازه‌سی وئرسین. پیغمبرین (ص) خندق جنگینده ایمام علی (ع) باره‌ده تاریخی جومله‌سی پیغمبر بویوردو: رقیب ایسته‌ین «عمرو»دیر. حضرت علی (ع) عرض ائله‌دی: اولسون! نهایتده پیغمبر اونون ایستگی‌ایله موافیقت ائله‌دی و اؤز قیلینجینی اونا وئردی و عمامه‌سینی اونون باشینا باغلادی و اونون باره‌سینده دوعا ائله‌دی و بویوردو: آللاه! علی‌نی پیسلیکدن ساخلا, ائی آللاه «بدر»ده «عبیده»نی و «اُحُد»دا آللاهین آسلانی «حمزه»نی الیمدن آلدین, آللاه! علی‌نی صدمه‌دن ساخلا. سونرا بو آیه‌نی تلاوت بویوردو: «رَبِّ لَا تَذَرْنِی فَرْدًا وَأَنتَ خَیْرُ الْوَارِثِینَ»، (انبیاء:89) و سونرا بو تاریخی جومله‌نی بویوردو: «بَرَزَ الْاِیمانُ کُلُّهُ اِلَی الشِّرْکِ کُلِّهِ»، یعنی ایمان و شیرکین بوتونلویو بیر-بیریله اوز به اوز اولدولار. ایمام علی (ع) تأخیرین جوبرانی اوچون سورعتله میدانا یولا دوشدو و عرب قهرمانی‌نین رجزی وزن و قافیه‌سینده بیر رجز اوخودو کی مضمونو بئله‌ایدی کی تلسمه, سسیوه جواب وئرمگه گوجلو کیشی گلیب !  . . . حضرت علی(علیه السلام) «عمرو»ین یادینا سالدی کی بئله بیر نذر دئییب «قریش»دن بیر نفر اوندان ایکی زاد ایسته‌سه بیرینی یئرینه یئتیره. عمرو قبول ائله‌دی. حضرت علی(علیه السلام) بویوردو: بیرینجی ایستگیم بودور کی ایسلامی قبول ائده‌سن. عرب قهرمانی دئدی: بو ایستکدن واز کئچ کی سنین دینینه احتیاجیم یوخدور. سونرا حضرت علی (ع) بویوردو: گل جنگدن واز کئچ و اؤز وطنینه قاییت و پیغمبرین ایشینی آیریلارینا ساخلا کی غالیب اولسا قریش اوچون بیر سعادت ساییلار و اؤلسه, سن ساواشسیز آرزینا چاتمیش اولارسان. عمرو جواب وئردی: قریش آروادلاری بئله دانیشمازلار, نئجه قاییدیم؟ بیر حالداکی محمده الیم چاتیب و ایندی واختی چاتیب کی نذریمه عمل ائدم؟ چونکی من بدر جنگیندن سونرا نذر ائله‌میشم کی محمددن اینتیقام آلمامیش باشیما یاغ سوتمه‌یم. بو دفعه حضرت علی (ع) بویوردو: پس جنگه حاضیرلاش کی  ایشین دویونون قیلینجلا آچاق. بو زمان عربین قوجا قهرمانی پؤرتلمیش پولاد کیمی قیزاردی و حضرت علی‌نی پیادا گؤرنده آتیندان یئنیب اونو پئیله‌دی و قیلینجی ایله حضرت علی‌یه حمله ائله‌دی و اونو شیدّتله او حضرتین باشینا یئندیردی. حضرت علی اونون ضربه‌سینی قالخانلا دفع ائله‌دی آما قالخان ایکی بؤلوندو و قبیلقه‌ده ایکی بؤلوندو و او حضرتین باشی یارالاندی. بو لحظه حضرت علی بیر فورصت تاپیب اونا مؤحکم ضربه ووردو و یئره سالدی. قیلینجلارین سسی و توز تورپاق قویموردو کی ایکی طرفین قوشونو نتیجه‌نی گؤرسونلر. آما بیردن-‌بیره حضرت علی‌نین (ع) تکبیر سسی اوجالدی و موسلمانلاردان شادلیق هارایی گؤیه قووزاندی و بیلدیلر کی حضرت (ع) عرب قهرمانینا غلبه ائدیب و اونون شرّینی آرادان آپاریب. پیغمبر (ص) حضرت علی‌نین (ع) او گونکی فداکارلیغین بئله بیان بویوردو: ««ضَربَةُ عَلِی یَومَ الخَندَقِ اَفضَلُ مِن عِبادَةِ الثّقلین»، علی‌نین خندق گونو ووردوغو ضربه دونیا اهلی‌نین عیبادتیندن افضلدیر.

قورآنی نئجه اوخوساق حرام اولار؟

قورآنی نئجه اوخوساق حرام اولار؟

ایلاهی آیه‌لرین موقدسلیگی و قاریلرین سسلری‌نین قورآن تلاوتینده اولان نقشلرینه دیقّت یئتیرماقلا بعضی نوع اوخوماقلار حرام و بعضیسی جاییزدیر. قورآن اوخوماق اوچون موختلیف مئتودلار وار کی بعضی نوع اوخوماقلار حرام و بعضیسی جاییزدیر. سسین تیترتمه‌سی‌نین (تحریر) حرام اولماسی باره‌ده پیغمبردن (ص) مشهور بیر ریوایت وار کی بوردا اونا ایشاره ائدیریک. او حضرت بویورور کی قورآن بوجور اوخونمامالیدیر: الیف: ترجیع بو سؤز باره‌ده موختلیف نظرلر وار. آما اونون مشهور تعریفی بودور کی سسده دالغا ایجاد اولا و سس آلچالیب اوجالا و سس اوزانا. بو حالت بوگون چهچهه آدیندا تانینیر. ب: نَوح بیر یول کی قاری ائشیدنلرین آغلاتماسینا چالیشار. حقیقتده ائله قورآن اوخویا کی قولاق آسانلار آغلایالار. ج: تحزین قاری قرائت زمانی طبیعی حالتدن چیخا و ریا اوچون آز قالا آغلایا کی قطعاً حرامدیر. چ: ترقیص کلمه‌لری قرائتینی یئیینله‌دیب یاواشاتماق و هابئله ساکین حرفلرین اوستونده دایانیب بیردن بیره سونراکی کلمه‌نین قرائتینی باشلاماق. خ: تطریب کلاما آهنگ وئرمک کی سسی چکمک و بوغازدا دولاندیرماغا تطریب دئیرلر. طرب و شادلیق یارادماق بو مئتوددا اولور. قورآنی شاد اوخوماق قبول ائدیله‌سی دئییل. د: ترعید ترعید سسی تیتره‌تماغا دئییرلر و تحریره بنزر بیر شئیدیر. البته تحریر خواننده‌نین اؤز ایختیاری‌ایله اولور آما ترعید یوخ. تحریری یارادماق اوچون اللری و بدنی ترپتمک ایشتیباهدیر و حقیقتده ترعید حسابلانیر. هر حالدا قورآن قاری‌لری گرک قرائتدن منظورلاری ایلاهی آیه‌لرین ایلقاسی اولسون و بو یوخاری هدفین یئرینی آیری بیر شئی توتمالیدیر.

ایمام صادقین (ع) 400 کیتابی

	ایمام صادقین (ع) 400 کیتابی
شهید اوّل «الذکری» کیتابین موقدمه‌سینده یازیر: ایمام صادیق (ع) اؤزلری شخصاً 400 کیتاب یازیبلار. تأسوفله ایمام صادقین کیتابلاری آرادان گئدیب و موختلیف دؤره‌لرده ضید شیعه جریانلاری طرفیندن محو ائدیلیب. تأسوف یئری وار کی رحمتلیک صدیق "من لایحضر الفقیه" کیتابیندا دئییر کی منده ایماملارین ال یازیسی وار, آما ایندی اهمال و دیقّتسیزلیک اثرینده آرادان گئدیب و بیزه چاتماییب. بیز بورادا نئچه کیتاب کی ایندی وار و ایمام صادقه (ع) منسوب اولور تانیتدیراجاغیق. ایمام صادیقه (ع) منسوب اولان کیتابلارا کیچیک ایشاره. آللاهین رسولوندان صلی الله علیه و آله سونرا معصوملارین بقیه‌سی کیتاب یازاردیلار و اؤزلریندن علاوه صحابه‌لرینی‌ده یازماغا تشویق ائدردیلر. ایماملارین ایچینده شاید ایمام صادق (ع) اونلارین هامیسیندان چوخ کیتاب یازیب, نئجه کی آیریلاریندان چوخ حدیث بویوروب. " تفسیر جعفر الصادق" : " ابوعبد الرحمن سلمی اثرلری مجموعه‌سی‌نین" باشلانیشیندا صفحه 21-دن 63- ـه جن عیرفانی سبکله بیر تفسیر بیان اولوب کی ایمام صادقه (ع) منسوب اولور. بو تفسیری کشیش «پولس نویا» تحقیق و چاپ ائدیب. بو تفسیر چوخ موختصردیر و فقط توحید سوره‌سینه‌ قدر شامیل اولور. "تفسیر القرآن کریم عند جعفر الصادق": بو تفسیر ده ایمام جعفر صادقه (ع) نیسبت وئریلیر و "کتابا الصادق: حقائق التفسیر القرآنی و مسباح الشریعه" کیتابیندا دؤکتور علی زیعورون ایشرافی‌ایله بیروتون عزالدین مؤسیسه‌سینده چاپ اولوب. بو تفسیر 92 صفحه‌دیر و فاتحه سوره‌سیندن دهر سوره‌سینه‌ قدر بیر سئری آیه‌لری سئچیب ایشاری و عیرفانی تفسیر ائدیب. و 4. ایمام صادقه (ع) منسوب اولان " کامل التفسیر الصوفی العرفانی للقرآن" کی بیروتدا دؤکتور علی زیعورون تحقیق ایله دارالبراقدا چاپ اولوب. بو کیتابین 272 صفحه‌سی وار و حقیقتده ایکی تفسیره شامیلدیر. بیری قورآنین اوّلیندن دهر سوره‌سی‌نین آخیرینه‌ قدر و بیری قورآنین اوّلیندن ایخلاص سوره‌سی‌نین آخیرینه‌ قدر. "التفسیر المنتسب الی مولانا ابی عبدالله جعفربن محمد الصادق علیهما السلام". بو تفسیر ایستانبولون نافیذ پاشا کیتابخاناسیندا ساخلانیلیر. بو تفسیر 317 صفحه‌دیر و او بیری تفسیرلرین عکسینه قورآنین بوتونلوگونه شامیل اولور. " تفسیر الامام الصادق علیه السلام" هندین پتنای دانیشگاهی‌نین مرکزی کیتابخاناسیندادیر کی سید نذر علی رضوی هندی اونو تحقیق ائدیب و ایکی جیلدده اؤز دؤکتورا ریساله‌سی کیمی اوندان دیفاع ائدیب. علی بن ابراهیم قمی هیجری قمری ایلین اوچونجو عصرینده شیعه موحدیثلریندن, "تفسیر القمی" آدیندا بیر قورآن تفسیری یازیب. بو تفسیرین چوخ یئرینده «قال» دئییر. و بیر عیدّه موحقیقلرین نظرینجه علی ابن ابراهیمین «قال» دن منظورو «قال الصادق (ع)» دیر. ائله بونا گؤره بو تفسیره " تفسیر الامام" دا دئییرلر. "کتاب مصباح الشریعه" اخلاقی و عیرفانی کیتاب کی علامه مجلسی و ایمام خمینی رضوان الله علیهما کیمی شخصیتلر اونو قطعی صورتده ایمام صادقدن(ع) بیلیبلر و اعتیماد ائدیب اوندان حدیث نقل ائدیبلر. آیری کیتابلار وار کی اونلار دا ایمام صادقه (ع) نیسبت وئریلیرلر مثلاً "توحید مفضل"، "رساله اهلیلجیه"، " نجاشی‌یه ریساله " ،" بعضی صحابه‌یه ریساله" و...

شیطان‌پرستلرین مراسیملری

	شیطان‌پرستلرین مراسیملری
شیطانپرستلرین مراسیملری/قره نامازدان قیزلاری قوربان ائله‌ماغا قدر شیطان‌پرستلرین بیر سئری مراسیملری وار کی دونیادا و مخصوصاً آمریکادا ایجرا اولور مثلاً قیزلاری شیطان نومادی‌نین قاباغیندا قوربان ائله‌مک کی دینله ضیدیت عنوانیندا ایجرا اولور. مودئرن شیطان‌پرستلیک تازا ظهور تاپمیش عیرفانلارین اَن نوفوذلی‌لاریندان ساییلیر. بو برنامه‌لرین بیری, اوکتوبرون 29-دا ایجرا اولان برنامه‌لردیر کی هالووین گئجه‌سی و یا قورخو گئجه‌سینه مشهوردور. شیطان‌پرستلر بو گئجه اوزلرینی گیریم ائدیب قورخولو ماسک تاخارلار و کوچه بازارا دوشوب جماعتی قورخودارلار. اونلار چالیشیرلار بیر ساده قورخونو دهشتلی بیر قورخویا تبدیل ائله‌سینلر. بو مسأله تفریحدن جیدّی و اؤلدوروجو بیر ایشه تبدیل اولوب و بو گئجه معمولاً بیر عیده قورخودان اورک و بئیین سکته‌سی اثرینده مریضخانایا یوللانیرلار. ائله کی 2011-جی ایلینده FBI-ین وئردیگی خبره گؤره بو گئجه‌نین قورخوسو اثرینده مین نفره یاخین مریضخانایا دوشوبلر. چوخ گؤروشوب کی شیطان‌پرستلر هالووین کلمه‌سینی خاص صورتده ماشینین دالی شوشه‌سینه یازیرلار. بو کلمه آغ رنگده و اَگری صورتده, شیطان‌پرستلرین مئتودی کیمی توت مدّین اوستونده یازیلار و بعضاً بو کلمه‌نین وسط حرفینده (O) دامجی عکسی چکیلر و یا دامجینی ماشینین وسط شوشه‌سی‌نین کونجونده داغیلمیش صورتده چکیرلر. بو دامجی ماویلرین (هم‌جینس‌بازلارین) موهوم نومادی ساییلیر. بو دامجی هالووین کلمه‌سی‌نین ایچینه سالیناندا شیطان‌پرستلیک و هم‌جینس‌بازلیغین ایتحادی معناسیندادیر. گونوموزده ماشینین فرهنگ اینتیقالیندا موهوم نقشی وار. بیر ماشین شهرین فرقلی بیر نوقطه‌سیندن آیری نوقطه‌سینه گئدنده او ناحیه‌نین فرهنگینی اؤزو ایله اینتیقال وئریر. چونکی ماشین اؤزونده چوخلو فرهنگی نیشانه داشی‌ییر و ماشینین بیر یئردن آیری یئره گئتمه‌سی‌ایله بو فرهنگ اینتیقال تاپیر. شیطان‌پرستلرین هالووین گئجه‌سیندن سونرا آیری مراسیملری وار کی اونلاردان قره‌نامازا ایشاره ائتمک اولار کی شیطان‌پرستلرین ان مشهور مراسیمی ساییلار. ربانی عشایا بنزر بو مراسیمده اونلار مسیحیتله اؤز ضیدّیتلیکلرینی گؤرستمک اوچون ربانی عیشا مراسیمینی ترسه ایجرا ائلرلر یعنی آخیردن اوّله. قوربانلیق کسمک شیطان‌پرستلرین آیری برنامه‌لریندن ساییلیر. قوربانلیق مراسیمی هر اوچ آیدان بیر و چوخ گیزلی صورتده ایجرا اولور. شیطان‌پرستلر بو مراسیمی اؤز نومادلاری‌نین قاباغیندا –کی بؤیوک شیطان موجسّمه‌سی و یا بیر ستون اولار- ایجرا ائلرلر و بعضاً چوخلی افرادین حضوری‌ایله بؤیوک جنگللرده ایجرا ائدرلر. قوربانلیق مراسیمی ایکی جور: یئددی یاشلی قیزلارین ذیبحی و یا 18 یاشلی باکیره قیزلارین ذیبحی ایله ایجرا اولار. بو مراسیمده قوربانلارین بدنین تیکه-تیکه ائدیب داغ سویون ایچینه آتارلار و یا اونلاری یاندیریب و بدنلری‌نین کولونو شرابین ایچینه تؤکوب ایچرلر. هابئله قوربانلیق مراسیمینده حاضیر اولانلارین هامیسی گرک قوربانین قانیندان ایچسین کی گلن ایل و یا گلن آیلاردا شیطانین صدماتیندان اماندا قالسین. بیرینه قان یئتیشمه‌سه وظیفه‌سی وار قوربانلیغین قانی قاتیلمیش سودان ایچسین.

بقیع قبریستانی نئجه سؤکولدو؟

	بقیع قبریستانی نئجه سؤکولدو؟
1344-جو هیجری قمری ایلین شَوالین سککیزینده ایسلام دونیاسی‌نین موهوم قبریستانی وهابیلر الیله سؤکولدو. چوخ آز اؤلکه‌ده حیجازداکی کیمی ایسلامین ایلکین عصرلریندن اثرلر وار. نییه‌کی ایسلامین دوغولان یئری اورادیر و ایسلام باشچیلاریندان موختلیف اثرلر اونون هر یئرینده گؤروشور. آما تأسوفله دوشونجه‌لری قورو موتعصیب وهابیلر, بو اثرلرین چوخونا شیرک اثرلری آدی قویوب آرادان آپاردیلار و بو ارزیشلی اثرلرین آزی قالیر. بو مسأله‌نین باریز نمونه‌سی بقیع قبریستانیدیر. بو قبریستان ایسلامین موهوم قبریستانیدیر کی ایسلام تاریخی‌نین موهوم بؤلومونو اؤزونده یئرلشدیریب و موسلمانلارین بؤیوک تاریخ کیتابی ساییلیر. بقیع قبریستانی‌نین قبرلری سؤکولمه‌میشدن قاباق, ایماملار و آیری ایسلام بؤیوکلری‌نین قبرلری اوستونده گونبذلر و بینالار واریدی. بقیع ایماملاری, سککیز ضیلعده دوزلمیش  و ایچه‌ریسی و گونبذی گژلنمیش بوقعه‌ده قویلانمیشدیلار. وهابیلر مدینه‌یه سولطه تاپاندان سونرا قبیرلری ییخماقدان علاوه اورداکی اثرلری‌ده آرادان آپاردیلار. بو واقیعه‌ده ایمام حسن موجتبی (ع)، ایمام سجاد (ع)، ایمام محمدباقر (ع) و ایمام جعفر صادقین(ع) مرقدلری ییخیلدی. اونلار ایماملاردان علاوه آیری قبرلری‌ده خرابلادیلار او جومله‌دن: فاطمه زهرایه (س) منسوب اولان قبر، عبدالله بن عبدالمطلب و آمنه (پیغمبرین آتا و آناسی) ، فاطمه بنت‌اسدین (ع) موطهر قبری (امیرالمومنین (ع)آناسی)، حضرت ام‌البنین (ع ) موطهر قبری ، پیغمبرین عمیسی عباسین قبری، پیغمبرین اوغلو ابراهیمین قبری, حضرت صادقین (ع) اوغلو اسماعیلین قبری، پیغمبرین اؤگئی قیزلاری‌نین قبری , پیغمبرین دایه‌سی حلیمه‌نین قبری و پیغمبر زمانی شهید اولانلارین قبری. بقیع بقیع ایماملارین قبری‌نین ایلک تخریبی وهابیلر الیله بقیع ایماملارین قبری‌نین ایلک تخریبی 1220 هیجری قمری ایلینده یعنی سعودیلرین بیرینجی حکومتلری‌نین عثمانلی ایمپراطورلوغو الیله ییخیلماسی زمانی اولدو. بو ایسلامی-تاریخی واقیعه‌دن سونرا ایران پادیشاهی رحمتلیک فتحعلی شاهین حیمایتی ایله سؤکولموش مرقدلر گؤزل صورتده تازادان دوزلدی و گونبذ و مسجید احداثی‌ایله بقیع, موسلمانلارین اَن گؤزل زیارتی-سیاحتی یئرینه چئوریلدی. بقیعین ایکینجی دفعه خرابلانماسی ایکینجی تاریخی-ایسلامی حادیثه 1344 هیجری قمری ایلین سککیزینده باش وئردی کی بو تاریخده وهابیلرین اوچونجو دفعه حکومته گلماقلاری ایدی. ائله بیر ایل کی وهابیلر بؤیوکلری‌نین فتواسی اساسیندا شیعه موقدسلرینی تحقیر ائله‌مک اوچون, ایماملارین و اهل بیتین (ع) قبرلرینه ایکینجی دفعه وحشیانه حمله ائله‌دیلر و بقیع قبریستانینی خرابلانمیش و تانینمامیش بیر قبریستانا چئویردیلر. مکه، مدینه، جده و کربلادا قبرلرین سؤکولمه سی وهابیلر 1343 هیجری قمری ایلینده مکه شهرینده حضرت عبدالمطلب (ع), ابی‌طالب (ع)، خدیجه (ع) و فاطمه زهرا (ع) قبری‌نین گونبذلرین, پیغمبرین ویلادت یئری و خیزرانی (پیغمبرین گیزلی عیبادت یئرین) توپراقلا بیر ائله‌دیلر و جده‌ده حوّانین قبری و آیری قبرلری داغیتدیلار. مدینه‌ده پیغمبرین گونبذین توپا باغلادیلار آما موسلمانلارین قورخوسوندان شریف قبره دَیمه‌دیلر. هابئله اونلار 1343-ون شَوالیندا بقیع قبریستانینی تورپاقلا بیر ائدیب دگرلی شئیلری تالادیلار و حضرت حمزه و اُحُد جنگی‌نین شهیدلری‌نین قبرلرینی تورپاقلا بیر ائله‌دیلر. همان ایل موتعصیب وهابیلر کربلایا حمله ائدیب و ایمام حسینین (ع) موطهر ضریحین سؤکوب اوندا اولان دگرلی شئیلری کی صفوی و قاجار شاهلاری‌نین هدیه‌لری ایدی تاراج ائله‌دیلر و جماعت و عالیملردن 7000 نفر جیواریندا آدام اؤلدوردولر. سونرا نجفه طرف گئتدیلر آما غارته موفق اولمادیلار و دالی اوتوردولار.

1344-جو هیجری قمری ایلینده بقیع قبریستانی وهابی‌لر طرفیندن تخریب

1344-جو هیجری قمری ایلینده بقیع قبریستانی وهابی‌لر طرفیندن تخریب اولدو

وهابیلرین مدینه‌یه سولطه تاپماقلاریله, شیعه ایماملاری و ایسلامین چوخلو بؤیوکلری‌نین قبری بو مونحریف فیرقه طرفیندن تخریب اولدو. او گونه‌ قدر مدینه‌ده دفن اولان ایماملار و ساییر ایسلام بؤیوکلری‌نین قبری اوستونده گونبذ و ضریح واریدی آما او زماندان بویانا وهابیلر ایسلام بؤیوکلری و ایماملارین قبیرلر و ضریحلرین تخریب ائله‌ماغینان موسلمانلاری او حضرتلرین زیارت فیضیندن محروم ائله‌دیلر. بو واقیعه‌ده تخریب اولان قبرلردن ایمام حسن موجتبی(ع), ایمام سجاد(ع),  ایمام محمد باقر(ع) و ایمام جعفر صادق(ع) قبری‌ایدی. وهابیلرین بو وحشیانه حرکتی, ایسلام دونیاسینی مخصوصاً شیعه‌لری ناراحات ائله‌دی. شیعه ایماملاری قبرلری‌نین داغیلماسیندان علاوه, حضرت عبدالله, حضرت آمنه (پیغمبرین آتا و آناسی), مالک, پیغمبرین عمیسی عباس, مالکی, ایمام جعفر صادقین (ع) اوشاقلاریندان اسماعیل و . . .قبرلری ده تماماً تخریب اولدو.

اورتا عصرلرده ایسلام دونیاسی فلسفه مرکزی‌ایدی*Orta əsirlərdə isl

اورتا عصرلرده ایسلام دونیاسی فلسفه مرکزی‌ایدی*Orta əsirlərdə islam dünyası fəlsəfə mərkəzidi

آمریکا فیلسوفلار انجومنی مودیری بونا ایشاره ائله‌مکله کی یوناندان سونرا فلسفه مرکزی غرب دئییلدی, دئدی: بو, ایسلام دونیاسی و ایسلامی فیلسوفلاریدی کی فلسفی رأیلرین مرکزی ساییلیردیلار. دؤکتور اریک توماس وبر, آمریکا فیلسوفلار انجومنی مودیری و می‌سی‌سی‌پی دانیشگاهی‌نین عمومی سیاست و فلسفه اوستادی, غرب فلسفه‌سی‌نین ایسلامی فلسفه‌دن آلدیغی تأثیره ایشاره ائدیب مهر خبرنیگارینا دئدی: موتقابیل تأثیرلنمه دوشونجه ساحه‌سینده و فلسفه‌ده نورمال مسأله‌دیر. او دئدی: کئچمیشده غرب فلسفه‌سی, ایسلامی فلسفه‌دن چوخلی تأثیر گؤتوروب. حقیقتده کئچمیشده و یوناندان سونرا فلسفه مرکزی داها غرب اولماییب. و بو ایسلام دونیاسی و ایسلامی فیلسوفلاریدی کی فلسفی رأیلرین مرکزی ساییلیردیلار. وبر ایدامه وئردی: فلسفه تاریخینی دیقّتلی تحقیق ائله‌سک گؤره‌جه‌ییک کی غرب, تازا دؤره‌ده فلسفه مرکزینه چئوریلیب. او دئدی: ایسلامی فیلسوفلار اورتا عصرلرده عین حالداکی بعضی یونانلی فیلسوفلارین او جومله‌دن افلاطون و ارسطونون تأثیری آلتیندا ایدیلر, اؤزلری‌نین تأثیرلری غرب فلسفه‌سینه چوخ اولوب. او آرتیردی: غرب, فلسفه‌یه قاییتماسیندا ایسلامی فیلسوفلارین اثرلری و رأیلریندن چوخلی فایدا آپاریب. وبر ایدامه وئردی: بعضی بیکر فلسفی نظرلر بیر نفرین آدینا ثبت اولوب حال بوکی آیری آدام اونو مطرح ائله‌ییب. نمونه اوچون دکارتی ذهن و عین ایکیلیغین بیناسین قویان تانی‌ییرلار و حال بوکی دکارتدان قاباق ابن‌سینا ذهن و عین ایکیلیغین مطرح ائله‌ییب. Orta əsirlərdə islam dünyası fəlsəfə mərkəzidi amerika fılsuflar əncüməni mudırı buna işarə eləməklə ki yunandan sonra fəlsəfə mərkəzi qərb deyyldi, dedi: bu, islam dünyası və islamı fılsuflarıdı ki fəlsəfi rəilərin mərkəzi sayılırdılar. Döktür ərik tumas vəbər, amerika fılsuflar əncüməni mudırı və mısısıpı danışgahının əmümi siyasət və fəlsəfə ustadı, qərb fəlsəfəsinin islamı fəlsəfədən aldığı təsirə işarə edib məhər xəbrnıgarına dedi: mutqabıl təsirlənmə düşüncə sahəsində və fəlsəfədə nurmal məsələdir. O dedi: keçəmişdə qərb fəlsəfəsi, islamı fəlsəfədən çoxlı təsir götürüb. Həqiqətdə keçəmişdə və yunandan sonra fəlsəfə mərkəzi daha qərb ulmayıb. Və bu islam dünyası və islamı fılsuflarıdı ki fəlsəfi rəilərin mərkəzi sayılırdılar. Vəbər idamə verdi: fəlsəfə tarixini dıqqtlı təhqiq eləsk görəcəyik ki qərb, taza dörədə fəlsəfə mərkəzinə çevərilib. O dedi: islamı fılsuflar orta əsərlərdə eyn haldakı bəzi yunanlı fılsufların o cümələdən əflatun və ərsətünün təsiri altında idılər, özəlrinin təsirləri qərb fəlsəfəsinə çox ulub. O artırdı: qərb, fəlsəfəyə qayıtmasında islamı fılsufların əsərləri və rəilərindən çoxlı fayda aparıb. Vəbər idamə verdi: bəzi bikər fəlsəfi nəzərlər bir nəfərin adına səbət ulub hal bukı ayrı adam unu mətərh eləyib. Nəmünə üçün dəkartı zəhən və eyn ikılığın bınasın quyan tanıyırlar və hal bukı dəkartdan qabaq əbnsına zəhən və eyn ikılığın mətərh eləyib.

آللاهدان غیرینه آند ایچمک شیرک ساییلماز

آللاهدان غیرینه آند ایچمک شیرک ساییلماز

شیعه تقلید مرجعی دئدی: آللاهدان سووای آیری موجوداتا دا آند ایچمک اولار. بیر حالداکی وهابیلر بو عقیده‌نی شیرک ساییرلار و اونلارین بو فیکرلری قورآنین و اوندا اولان آندلارین خیلافینادیر. مهر خبرنیگاری‌ گوزاریشینه گؤره, آیت‌ الله العظمی جعفر سبحانی «قم» شهرینده حجتیه مدرسه‌سینده قورآن تفسیرینده «تین» سوره‌سی‌نین تفسیری ضیمنینده دئدی: آللاه بو سوره‌ده و اونون بیرینجی آیه‌سینده انجیره آند ایچیر کی بو میوه‌نین اهمیتینی گؤرسه‌دیر. او ایدامه وئردی: بعضی موفسیرلر بو ایکی کلمه‌نی میوه حئسابلامیرلار و بئله بیلیرلر کی آللاهین منظوری سینا چؤلونده ایکی موقدس تین و زیتون داغلاریدیر. قمین علمیه حوزه‌سی‌نین اوستادی طور سینایا آند ایچماغا ایشاره ائدیب دئدی: هابئله بو سوره‌ده موقدس طور سینایا آند اولور کی بو داغدا تورات حضرت موسی‌یه (ع) نازیل اولدو. او بو سوره‌نین موختلیف آیه‌لرینه ایشاره ائله‌مکله بویوردو: بو آیه‌لر گؤرسه‌دیر کی آللاهدان غیرینه‌ده آند ایچمک اولار , بیر حالداکی وهابیلر بو ایشی شیرک ساییرلار و اونلارین بو فیکرلری قورآنین و اوندا اولان آندلارین خیلافینادیر. آیت‌الله العظمی سبحانی قورآن سوره‌لرینده آنددان مقصده ایشاره ائدیب آرتیردی: تین و زیتون کیمی بعضی آندلار او ماده و یا شخصین اهمیتینه ایشاره ائدیر و بعضی آندلار دا بیر شئیین و یا یئرین  موقدس اولماسینا نیشانه‌دیر مثلاً بلد امین و یا همان مکه. بو قورآن موفسیری تأکید ائله‌دی: بلد امین یا مکه موقدس بیر یئردیر کی اونون تقدوسی تشریعی و قانونی‌دیر و ائله بونا خاطیر اورا پناه آپارمیش موجریمی اؤلدورمک اولماز.

یالانچی مودعی‌لرین ایدعاسی: ایمام زمانلا(عج) رابیطه‌میز وار

	یالانچی مودعی‌لرین ایدعاسی: ایمام زمانلا(عج) رابیطه‌میز وار
مهدویت اعتیقادینا سطحی باخماغین عاقیبتین بیلمک اوچون او حضرتله رابیطه ایدعالاری اولانلار و حتی بیر عیده اؤزونو او حضرت تانیتدیرانلارین پرونده‌سینه باخماق اولار. آشاغیدا بو یالانچی مودعی‌لرین بیر سئریسی ایله تانیش اولوروق. -          بیر قیزین اهواز کندلری‌نین بیرینده, ایدعاسی وار کی ایماملارلا رابطه‌سی وار و ناخوشلارا شفا وئریر. «ز ـ ج» 21 یاشلی قیزدیر کی بیر مودت قاباق ایدعا ائله‌دی ایمام حسین(ع) اونون یوخوسونا گلیب و اونا ناخوشلاری شفا وئرمگه ایجازه وئریب. سونرا اونون قارداشی و عمیسی اوغلو, اونون تبلیغینده فیلیم و سی‌دی پایلادیلار. بو ایش اورا قدر بویودو کی چوخلو جماعت اوزاق-‌یاخین کندلر و شهرلردن او قیزین ائوینه گلدیلر و اونون فامیللری جماعتین نذیرلرین ییغماغا باشلادیلار. او بیر مودّت سونرا ایدعا ائله‌دی حیاطلارینداکی خورما آغاجی ناخوشلارا شفا وئریر. -          عوام ایچینده بیر شایعه‌ یاییلدی کی بیر تقلید مرجعی ایمام زمانین (عج) قاتیلین گؤروب. شایعه‌چیلر کی بیر عیده فرهنگی محصولات تهیه‌ائدنلر ده اونلارین ایچینده واریدیلر بیر پارا کاغاذلار و سی‌دی‌لر چیخاتدیلار و ایدعا ائله‌دیلر: آیت الله العظمی . . . دستاماز آلاندا هوشدن گئدیر و هوشه گلیب حالیندان سوروشاندا دئییر کی, ائله ایندی ایمام زمانین (عج) قاتیلی دونیایا گلدی و بی‌هوشلوقدا اونو اوزونو گؤره بیلدیم ! ادامه مطلب yazının ardı
+ ن

ایمام حسن (ع) و معاویه‌نین صولحنامه‌سی

	ایمام حسن (ع) و معاویه‌نین صولحنامه‌سی
ایمام حسن (ع) اوِّلده اؤزونو معاویه‌ایله جنگه حاضیرلادی, آما کؤمکلری‌نین ثابیت‌قدم اولمادیغی و ایسلام دینینه دَیَن ضربه‌یه گؤره مجبور قالدی معاویه‌ایله صولح ائلیه. ادامه مطلب yazının ardı
+

ایسلامی عیرفاندا اوروج

	ایسلامی عیرفاندا اوروج
اوروجون فلسفه‌سی ظاهیری اؤتمک و ایلاهی ویصالا چاتماقدیر. عاریفلر قورآنین آیه‌لریندن ایستیفاده ائدیب بو نتیجه‌یه یئتیشیرلر کی اوروج بونا گؤره واجیب اولوب کی اینسانی ایلاهی ویصالا چاتدیرسین. ادامه مطلب

قدر گئجه‌سی‌نین عمللری*Qədr gecəsinin əməlləri

	قدر گئجه‌سی‌نین عمللری*Qədr gecəsinin əməlləri
1. غوسل ائتمک. غوسل ائدرکن بئله نیت ائتمه‌لی‌دیر: "احیا گئجه‌سی‌نین غوسلونو ائدیرم قوربتن ایلاللاه". بو غوسلون بؤیوک ثوابی واردیر. 2. سحره قدر اویاق قالیب عیبادتله مشغول اولماق. سحره قدر اویاق قالیب عیبادتله مشغول اولماغین معناسی بودور کی، اینسان دئییر: "ایلاهی، سن بو گئجه منه قورآن نازیل ائدیرسن و من ده بو گئجه سحره قدر اویاق قالیب اونو قارشیلاییرام." ادامه مطلب

معصوملارین قیافه سین نوماییش وئرمک اولارمی؟

معصوملارین قیافه سین نوماییش وئرمک اولارمی؟
شیعه نیوزون وئردیگی معلوماتا گؤره اوروجلوق گونلرینده عربی شبکه‌لری طرفیندن "امام الفقها" آدیندا بیر سریال امام صادق "علیه السلام" زیندگانلیغی باره ده یاییلیر کی اوندا ایمام صادقین (ع) اوزو نوماییش وئریلیر. و بئله شایعه سالمیشدیلار کی آیت الله سید علی حسینی سیستانی (دام ظله) بو فیلیمین نوماییشی ایله موافیقدی. بو اساسدا موعظم‌له‌دن ایستیفتا اولدو کی ایستیفتا و جوابی بئله‌دیر: ادامه مطلب

آل سعود اُحُد داغین ماغاراسین بتونلا دولدوردو

	آل سعود اُحُد داغین ماغاراسین بتونلا دولدوردو
آل سعود تازا عجیب بیر ایشده مدینه شیمالیندا یئرله‌شن ثنایا ماغاراسی‌نین آغزینی بتونلا دولدوردو. ثنایا ماغاراسی همان ماغارادیر کی پیغمبریمیز اُحُد ساواشیندا یارالانیب اورا سیغینمیشدی. بو ایش عربستان پادیشاهی امری ایله باش وئریب. داغین داشلاری و بتونلا ماغارانین آغزینی دولدوردولار و اوسته‌لیک داغین اتگینه‌ده ایک مأمور قویدولار کی هئچ کس داغا چیخانماسین. اونلار اگر آدلارین موسلمان قویوبلار بو ایش گؤرسه‌دیر کی تماماً پیغمبرین و ایسلامین ضیدّینه اللشیرلر و ایسلاملاری یالاندیر. حتّا اگر موسلمان‌دا اولماسالار بو ایش توریستی باخیمدان آخماق‌یانا ایشدن سووای هئچ نه دئییل. مگر اولار بیر عیدّه‌نین عشقی اولان داغین اتگینه مأمور قویاسان کی بو داغا چیخماق یاساقدیر؟!!

مولانانین شعرلری ایمام علی‌نین (ع) معنوی مقامینی ان گؤزل حالتده

مولانانین شعرلری ایمام علی‌نین (ع) معنوی مقامینی ان گؤزل حالتده تصویره چکیب

مولانانین امیرالمؤمنین حقّینده دئدیگی شعرلر تاریخ بویوندا او حضرت حقّینده دئییلن شعرلرین ان گؤزلیدیر. ایمام علینی(ع) معنوی جهتدن تحلیل ائدن و او حضرتین ایلاهی شخصیتین  دوزگون تفسیر ائلیه‌ن مولانا اولوب کی بو ایشی ان گؤزل صورتده یئرینه یئتیریب. مولانا ایمام علی‌نین (ع) عمر بن عبدودله ساواشی‌نین جریانینی نقل ائله‌مکله او حضرتی ایلاهی عرشین قوشونا تشبیه ائله‌ییب کی ایلاهی عرشه قدر اوجالیب. آی, گئجه‌ده گئدنلری هیدایت ائدر, آییین دیلی اولسایدی ایتَنلری داها تئز هیدایت ائلردی, چونکی حضرت محمد (ص) گونش و حضرت علی (ع) ویلایت آییدیر. مولانا حضرتی آیا بنزه‌دیر کی اونون ویلایت ایشیقی هر یئری ایشیقلاندیریب و دیله گلسه, حقیقت یولونون موسافیرلرینی داها یاخشی هیدایت ائلر. چون تو بابی آن مدینه علم را/ چون شعاعی آفتاب حلم را* باز باش ای باب بر جویای باب/ تا رسد از تو قشور اندر لباب* باز باش ای باب رحمت تا ابد/ بارگاه ما له کفوا احد* مولانا «أنا مدینة العلم و علی بابها» نَبَوی حدیثینه ایشاره ائدیب, مولا علینی (ع) سخاوت و کرامت نمونه‌سی بیلیر. او مینلر نفرین ایشینی گؤرن صف‌سیندیراندیر. مولانانین اعتیقادینا گؤره ایمام (ع) بیر پهلواندیر کی نفسینه غالیب اولوب و اونون قیلینج وورماسی فقط حقّه خاطیردیر. مولانانین نظرینه گؤره مولا علی (ع) اؤز قاتیلین تانییر و اونا رحم ائلیر و هئچ واخت اونا غضبلنمیر. مولانانین باخیشیندا ایمام علی (ع) عدالت و حقّین کامیل مظهریدیر و او قدر شوجاعتی‌ایله بئله, صبر و دؤزوم مظهریدیر. هر حالدا مولانا بو موضوعنی ایکی‌یوز بئیتده قوشوب و هئچ کسین باره‌سینده بئله گؤزل شعر دئمه‌ییب و حقیقتاً ده حضرت علی‌نین (ع) معنوی مقامینی چوخ گؤزل تصویره چکیب.

قورآنین خورافاتلا موباریزه‌سی

	قورآنین خورافاتلا موباریزه‌سی
ایجتیماعی موصلیحلر و پیغمبرلرین اصلی دغدغه‌لریندن بیری خورافاتین جامیعه‌ده یاییلماسی اولوب. آللاه تعالا خورافات باره‌سینده چوخلو آیه‌لرده صؤحبت ائدیب. خورافاتین قاباغین آلما یوللاری جامیعه‌نی درمان ائتمگین بیر یولو خورافاتلا موباریزه ائله‌مک و جماعتی شیّادلار عوضینه عالیملر و فیکیر رهبرلری طرفینه سوق وئرماقدیر. بو زمینه‌ده اهل بیتدن(ع) چوخلو ریوایتلر نقل اولوب کی موضوعنون اهمیّتی و بیدعتلرله موباریزه ائتمک باره‌سینده‌دیر. چونکی جماعتین ساوادین چوخاتماق خورافاتین قاباغین آلار. گؤره‌سن قورآن خورافاتلا موباریزه اوچون یول تانیتدیریب؟ قورآنین منطیقلی عقیده‌لرین مطرح ائله‌مه‌سینده و یونگون عقیده‌لرله موباریزه ائتمکده‌کی خصوصیتی نئجه‌دیر؟ قورآن نئچه یوللا یونگول عقیده‌لرله موباریزه ائله‌مگه باش قوشوب: عقیده‌لرده دوشونماق و فیکیری اساس توتماق, دوشونجه‌نین آزادلیغی, موختلیف منبعلردن ایستیفاده ائله‌مک و علمه اهمیت وئرمه‌سی. قورآنین خورافاتلا موباریزه‌سیندن نمونه‌لر خورافاتلا موباریزه‌نین اصلی محوری, باطیل و مونحریف عقیده‌لر و غیری عقلانی ایشلرله موباریزه ائله‌مکدیر. بو مسأله‌لرین بعضیسی قورآن نازیل اولان عصرده‌ده مطرح‌ایدی, آما بویونده خورافاتلا موباریزه‌یه دیقّت یئتیرمک لازیمدیر. سِحر, جادو و جین توتماق کیمی ایشلر کی خانیواده موحیطین بیر-بیرینه قاریشدیریر و قورآن اونونلا موباریزه ائلیر. (بقره سوره‌سی‌نین 102-جی آیه‌سی و سبأ سوره‌سی‌نین41-جی آیه‌سی) توحید حدودوندان اوزاقلاشماق و موقدساتی پرستیش ائله‌مگی رد ائله‌مک (آل عمران سوره‌سی‌نین 79-جو آیه‌سی) ملکلر, پیغمبرلر و بؤیوک عالیملری آللاه یئرینه ارباب حسابلاماغی رد ائتمک (آل عمران سوره‌سی‌نین 80-جی آیه‌سی) حضرت عیسی (ع) مقامی و جایگاهی باره‌ده موبالیغه ائتمگی نفی ائتمک و تثلیثی ردّ ائله‌مک. (نساء سوره‌سی‌نین 171-جی آیه‌سی) عیبادت تکجه آللاه اوچوندور, غرور و کیبر رد اولونور. (نساء سوره‌سی‌نین 172-جی آیه‌سی) عیسی(ع)-ین آللاهلیغین نفی ائتمک و آللاها شریک توتمانین نفیی. (مائده سوره‌سی‌نین 72 و 73-جو آیه‌سی) بوت پرستلیقلا موباریزه کی خورافه‌پرستلیگین بیر نمونه‌سیدیر. (اعراف سوره‌سی‌نین 183-جو آیه‌سی) ایسلام پیغمبری(ص) زمانی بیر عیده یهودیلر طرفیندن «عُزَیر»ی آللاه حسابلاماقلا موباریزه. (توبه سوره‌سی‌نین 30-جو آیه‌سی) اینسانلاری آللاه حسابلاییب پرستیش ائله‌مگی نفی ائتمک. (مریم سوره‌سی‌نین 83-جو آیه‌سی)  آللاهین اوشاغی اولماسینا داییر عقیده‌ایله موباریزه (مریم سوره‌سی‌نین 88 و 89-جو آیه‌لری)  توحید خیلافینا اولان عقیده‌لرله موباریزه. ( اسراء سوره‌سی‌نین 40-جی آیه‌سی) بو آیه‌لر قورآنین کئچمیشده‌کی خورافاتلارلا موباریزه‌سی‌نین بیر نئچه‌ نمونه‌سیدیر کی بؤیوک پیغمبرلر عمل ائدیبلر و اونلارا ایشاره ائله‌مکله بیزه معیار گؤرسه‌دیرلر.

ایسلامدا بایرام؛ فردی بایرام و ایجتیماعی بایرام

	ایسلامدا بایرام؛ فردی بایرام و ایجتیماعی بایرام
بایرام ارزیشلری تقویت ائتمک اوچوندور اهل بیت ریوایتلرینده گلیب کی هر مؤمین کی آللاهین ایطاعتی اونا نصیب اولا و گوناهدان و معصیَتدن اوزاق اولا, او گون اونون بایرامیدیر. آما ایسلامی خاص بایراملار بوتون موسلمانلارین بایرامیدیر. بایرام او گونه دئییلیر کی اینسان ایلاهی قوربه یاخین اولا و گوناهدان اوزاق اولا. او گون مؤمین اینسانین شادلیق و بایرام گونودور. ایسلامی بایراملار ائله بو اساسدادیلار. میثال اوچون مبعث بایرامی و یا ویلایت بایرامی‌نین آللاها یاخین اولما جنبه‌سی وار. یعنی اینسان, اولیانین ویلایتی و پیغمبرلرین بعثتی اثرینده ایلاهی عبودیت مرزلرینه و اخلاق مرزلرینه چاتیر. فیطر بایرامی‌دا آللاهین مؤمین بنده‌لره بیر آی بویو عیبادت ائدیب اوروج توتدوقلاری اوچون وئردیگی پاداشدیر. آیری طرفدن‌ جماعتله مهریبان اولماق کیمی ایجتیماعی اخلاقا دیقّت یئتیرمگه‌ده توصیه اولوب و بو آیدا فردی اخلاق بؤلومونده‌ده دوشونمک و معرفةالنفس مسأله‌سینه آرتیق توصیه اولوب. یعنی مؤمین هم فردی و هم ایجتیماعی اخلاقدا ایلاهی قوربه ال تاپیر و آللاهین ریضایتین کسب ائدیر. بنده‌لیک مسؤولیتینی دوزگون یئرینه یئتیرن بیر آیلیق اوردونو موفقیَّتله باشا وئریب و بونا گؤره‌ده آللاه اونا بایراملیق عطا ائدیب کی بو, آیین آخیرینده بیر پاداش ساییلیر. فیطر بایرامیندا توصیه اولان نامازین بیرینجی رکعتینده اعلی سوره‌سی و ایکینجی رکعتینده شمس سوره‌سی اوخونور کی جان و مال تزکیه‌سینه توصیه اولوب. اعلی سوره‌سینده گلیر کی «قد افلح من تزکی» و شمس سوره‌سینده گلیر کی « قد افلح من زکاها» کی هر ایکیسی‌ده گؤرسه‌دیر کی اوروجلوقدان هدف مؤمینین جان و مالی‌نین پاکلانماسیدیر. پیغمبردن بیر ریوایت وار کی بویورور: اوروج توتانین ایکی سئوینجی وار بیری ایفطار واختی‌نین سئوینجیدیر و بیر‌ی‌ده آللاهلا گؤروشنده‌دیر.