X
تبلیغات
رایتل

نیظام انیتیظاملا شادلیق و موفقیتین آراسینداکی رابیطه

سه‌شنبه 17 اردیبهشت‌ماه سال 1392 ساعت 10:43 ق.ظ

نیظام انیتیظاملا شادلیق و موفقیتین آراسینداکی رابیطه

شخصی و ایجتیماعی یاشاییشدا نیظام انیتیظاملی اولان اینسانین دوشونجه‌لری مخصوص حالدا تصنیفلشمیش اولار، بونا گؤره‌ده موفقیّت آددیملارینی راحاتلیقلا یوخاری گئدیب روحی فیشاردان آماندا اولوب فرحلی اولار. بوتون وارلیغین اساسی نیظام انیتیظام اوستونده‌دیر و اوندا هر بیر شئیین اؤزونه مخصوص یئری و رولو وار. سما جیسملری‌نین حرکتی، فصللرین اینتیظاملی دولانماسی، گئجه گوندوز، اینسان بدنی‌نین اورگانلاری‌نین ایشی و حرکتی هامیسی اینتیظامین اهمیّتینی گؤستریر. خیلقتده اینتیظامی یارادان آللاه اونو اینسانین فردی و ایجتیماعی یاشاییشیندا دا سئویر.

ایجتیماعی اولماق و جامیعه ‌طرفیندن قبول اولمانین بیر یولو جامیعه‌ده‌کی اینتیظامی و قایدالاری رعایت ائله‌مکدیر. قایدالار فردلرین داورانیشینی کونترول ائلر و هدفلی و موفق یاشاییشا سبب اولار. قورآن کریم قمر سوره‌سی‌نین 49-جو آیه‌سینده بویورور: بیز هر شئیی اندازه‌سی قدر یاراتمیشیق.

آما اساس مسأله بو اینتیظامین نئجه اولماسیندادیر و اونون اؤریرنماغی‌نین نئجه‌لیگینده‌دیر. بو سوآلین جوابینا موختلیف نظرلر وار. چونکی بو موضوع تمامیله بیر میلّتین کئچمیشینه و فرهنگینه باغلیدیر.

اینضیباطدان مقصد اینسانین جامیعه‌ده‌کی قایدالارلا اویغون اولا بیلمه‌سیدیر. بیر طرزده کی فردلر اؤز داورانیشلارینی یاشادیقلاری جامیعه‌نین ایستکلری و طلبلریله اویغونلاشدیرسینلار. قایدالارین رعایتی نه فقط عادتلرین رعایتی باخیمدان اهمیّتلیدیر بلکه اینسانین شاد و ساکیت یاشاماسیندا دا اهمیّتی وار. اینتظام، اینسان یاشاییشیندا شادلیغین اساسلاریندان بیریدیر.

ایسلامین کرامتلی بؤیوکلری، اینتظامی اینسان یاشاییشی‌نین موهوم مسأله‌لریندن بیری ساییبلار. مولا علی (ع) ایمام حسن (ع) و حسینه (ع) وصیتینده بئله بویورور: سیز و بوتون اوشاقلاریم و بو مکتوبون یئتیشدیگی هر کسه آللاهدان قورخماغی و ایشلرده نیظام اینتیظامی رعایت ائله‌مگی وصیّت ائلیرم. (نهج البلاغه، خوطبه157، نامه 47)

اینتیظام، مقصده چاتماغا بیزیم چکدیگیمیز زحمتی آزالدار آما اینتیظامسیزلیق چوخ واختلار عصبلشمک، ایسترس و حتّا مغلوبیته‌ده گتیریب چیخارار.

اینتیظامسیزلیق آیری موشکوللر ده یارادار کی خولاصه اولاراق اونلارا ایشاره ائدیریک:

- اینسانین ایجتیماعی شخصیّتین پوزار

- آیریلارین حقّینی آیاقلاماغا سبب اولار

- اینسانین مادی سرمایالار و عؤمرونو هدر وئرر

- یاشاییش و ایش مسأله‌لرینی بیر-بیرینه وورار

یاشاییشیندا اینتیظاملی اولان شخص، گئیینیش، بزک، کلمه‌لردن ایستیفاده ائله‌مکده و جومله‌لرین تنظیمینده، عهده وفا ائله‌مکده، ایش و یاشاییش یئرینی بزه‌مکده آیریلار اوچون مودئل اولار. نتیجه‌ده اونلارین محبتی و موراجیعه‌سینه توش گلر و بئله‌لیکله فردین شادلیغی اؤز یاشاییشیندا چوخالار.

del.icio.us  digg  newsvine  furl  Y!  smarking  segnalo