سویوق سو ایله چای دمله‌یین

سویوق سو ایله چای دمله‌یین

ایختیراعچیلار تازالیقدا سویوق سویو داغ سویا چئویرن بیر دستگاه دوزلدیبلر.

سویو قیزدیرماغا چوخلو انرژی لازیم اولور و بو مسأله عاییله‌لره یوخاری خرجلر تحمیل ائلیر. آما بو خرجین آزالدیلماسینا آز دیقّت یئتیریلیب. تازالیقدا موحقیقلر سویوق سویو قیزدیرماق اوچون تازا بیر وسیله دوزلدیبلر.

بو وسیله سویوق سوداکی انرژینی آلیب همن انرژی ایله سویو قیزدیریر. بو محصولون دوزلدنلری‌نین دئدیگینه گؤره،  21 درجه سانتیگراد حرارتی اولان شهر سویو بو وسیله‌یه داخیل اولماقلا حرارتی آلینیب مخزنده‌کی سویون قیزدیرماسینا ایستیفاده اولور.

بو وسیله سویوق سو مخزنینه 76 لتیر سویون داخیل اولماسیله، 189 لتیرلیک مخزنین سویونو داغلاندیرا بیلر.

تیلویزیون تصویرلرینی اییله‌یین/آوریل‌فول یالانی واقعیّته دؤندو

تیلویزیون تصویرلرینی اییله‌یین/آوریل‌فول یالانی واقعیّته دؤندو

هر زادی اوزاقدان اییله‌مک سیستمی‌نین ایختیراعسی نئچه گون بوندان اوّل آوریل‌فول یالانی آدلاندیریلسا دا، ژاپونلی عالیملر بو یالانی واقعیّته چئویردیلر. ژاپونلی موحقیقلر تازا بیر اکران صفحه‌سی ایختیراع ائدیبلر کی تاماشاچی اونون تاماشاسیندان علاوه اوندا گؤرونن یئمک تصویرلرینی اییله‌یه‌ده بیلر.

بو اکران صفحه‌سی توکیونون اکینچیلیک و تکنولوژی دانیشگاهیندا "هاروکا ماتسوکورا"نین الیله دوزلیب. بو  LCD صفحه هر زادین گؤرسندیگی نوقطه‌دن اونون ایینی هاوایا داغیدیر.

بو تکنولوژی صفحه‌نین دؤرد یانیندا یئرلشیب دؤرد هاوا جریانلا بوخارلانان ژِل ایله تغذیه اولور.

بو هاوا جریانی دؤرد عدد فن وسیله‌سیله صفحه‌ایله پارالل اسیر. بو جریانلارین سمتی و گوجو صفحه‌ده‌کی تصویره باغلی اولور. هاوا جریانی او قدر یوموشاقدیر کی تاماشاچی بو ایین صفحه‌ده کی تصویردن اولدوغون ظن ائلیر.

بو سیستم ایندیلیکده هر آندا فقط بیر ایی ساچا بیلیر آما اونو دوزلدنلر دئییر بو ایختیراعنین ایکینجی آددیمی ایی دگیشدیرمگه پرینترلرین کارتریجلرینه بنزر بیر کارتریجین قوشماسی اولاجاق.

بو صفحه فلوریدانین اورلانداسیندا  IEEE مجازی واقعیت کونفرانسیندا عرضه اولدو.

Gmail ده بعضی دگیشیکلیکلر اولاجاق

Gmail ده بعضی دگیشیکلیکلر اولاجاق

گوگل الکترون پوستی راحاتلاتماق اوچون تازا دگیشیکلیکلر ائتمگی بیلدیریب. ایندیلیکده Gmail سرویسینده ایمیل یوللاماق اوچون Compose دویمه‌سینی باسماقلا مکتوب یازماغا کیچیک بیر صفحه آچیلیر. بوندان اوّل ایمیل گؤندرمگه تازا بیر صفحه‌یه گئتمک لازیم اولوردو و ایندیکی حالت قاباقکیندان داها آز واخت آپاریر.

آما گوگلین اعلامینا گؤره تازا دگیشیکلیکلرله ایندیکی حالتی دگیشیب الکترون پوستدان ایستیفاده ائله‌مگی داها دا راحاتلاداجاق.

اوشاقلارین سالدیرقانلیغینی آغیز سویونون آنالیزی ایله تشخیص وئرمک

اوشاقلارین سالدیرقانلیغینی آغیز سویونون آنالیزی ایله تشخیص وئرمک

آغیز سویونون آنالیزی اوغلان اوشاقلاری‌نین سالدیرقان اولوب اولمادیقلارینی تشخیص وئرمگه کؤمک ائلیه بیلر. «سینسیناتی» مریض‌خاناسی‌نین طیبّی آراشدیرمالار مورکزی‌نین موطالیعه‌لرینه گؤره آغیز سویونداکی هورمونلارین غیلظتی ایله اوشاقلارین سالدیرقانلیغی‌نین آراسیندا رابیطه وار.

موحقیقلر 7 - 9 یاشلاریندا اولان اون یئددی اوشاغین آغیز سویوندان نمونه گؤتوروبلر. بو اوشاقلارین روحی موراقیبتلره احتیاجلاری اولدوقلاری مریض‌خانا طرفیندن تأیید اولموشدو.

بو نمونه‌لری اوچ؛ تستوسترون، دهیرواپیاندروسترون و کورتیزول هورمونلاری سطحینده آنالیز اولوندو.

موحقیقلر گؤردولر اوشاقلارین سالدیرقانلیغی‌نین حدّی بو هورمونلارین اندازه‌سی ایله رابیطه‌لیدیر. اونلار سالیم و ناخوش اولمایان اوشاقلارین آغیز سولارین‌دا آنالیز ائله‌دیلر. اله گلن نتیجه بو مسأله‌نی تأیید ائله‌دی.

بو موحقیقلر اینانیرلار آغیز سویونون واختیندا و دقیق آنالیزی‌نین آیری فایدالاری‌دا اولا بیلر. اونلارین نظرینه، آغیز سویونون هورمونلارینی آنالیز ائله‌مک ناخوشلارین درمانی اوچون طبیبلره کؤمک ائلیه بیلر.

مریخه سفر ائتمگه بیر ار-آرواد لازیمدیر

مریخه سفر ائتمگه بیر ار-آرواد لازیمدیر

خصوصی بیر تشکیلات بیرینجی فضایی توریستین باشچی‌لیغی ایله 2018-جی ایله‌دک ایدّعالی بیر طرحله مریخه سرنشینلی سفینه گؤندرمک فیکرینده‌دیر. اونلار بو سفینه‌ایله یوللاماق اوچون بیر ار-آرواد آختاریرلار.

لایوساینسین وئردیگی خبره گؤره، بو طرح 2001-جی ایلده اؤز خرجی ایله گؤیه گئدن آمریکالی میلیاردر، دنیس تیتو طرفیندن ایجرا اولاجاق. اونلارین اینسانلاری مریخ سیاره‌سینه یئندیرمک قصدلری یوخدور بلکه سیاره‌لرین چوخ نادیر حاللاردا باش وئرن بیر سیرادا دوزولمکلریندن ایستیفاده ائدیب، مریخین کناریندان رد اولماق قصدلری وار.

تیتو اؤز طرحینی آمریکانین میلّی مطبوعات کلوبوندا مطرح ائدیب خبری کونفرانسدا دئدی: «مریخین ایلهام بونیادی» آدیندا بیر تشکیلات بو مأموریّتین حامیسی اولاجاق.

تیتو امیدوارلیغین بیلدیردی کی لازیم اولان راکئت و سفینه‌نین بازاردان آلیب ایکی نفری 501 گونلوک دولاندیرا بیلن شکلده دَییشیب مریخه طرف گؤندره.

تیتو دئییر ار-آروادی بو سفینه‌نین سرنشینلری کیمی یوللاماق، فضایا گئدنلرین تجریدلری اثرینده موبتلا اولدوقلاری روحی موشکوللرین قاباغین آلاجاق.

بو سفر قراردی 2018-جی ایلین ژانویه‌سینده باشلایا.

تیتو دئییر: 500 گون عرضینده مریخه سفینه یوللاییب قایتارماغین اله دوشمک فورصتی چوخ نادیردیر. بو فورصت الدن گئتسه همن ایشی ایکی اوچ ایلده گؤرمک اولار.

تیتو بو طرحی موشکوللو بیلسه‌ده اونو حیاتا مومکون بیلیر.

روسیه‌ده گؤی داشی‌نین تیکه‌لری تاپیلدی

روسیه‌ده گؤی داشی‌نین تیکه‌لری تاپیلدی

نئچه گون آختاریشدان سونرا روس عالیملری،جومعه گونو روسیه‌‌ده اورالین گؤیونده پارتلایان گؤی داشی‌نین تیکه‌لرینی تاپماغا موفق اولدولار.

فرانسه خبرگوزاریسی‌نین وئردیگی خبره گؤره، روس عالیملری چلبیانسک شهری و  اورالین اوستونده پارتلاییب بو منطقه‌نین موختلیف یئرلرینده یئره‌ دَیَن گؤی داشی‌نین بعضی تیکه‌لری‌نین تاپماسینی دئییبلر.

روسیه‌نین فوق‌العاده حاللار ویزارتی یکشنبه گونو اعلام ائله‌میشدی: بو گؤی داشی‌نین قطعه‌لری‌نین دوشمه‌ احتیمالی اولان چربارکول گؤلونون غواصلار طرفیندن آختاریلماسی نتیجه وئرمه‌دی.

آما منطقه‌یه یوللانان اورال دانیشگاهی‌نین عالیملری بو گؤی داشی‌نین 50 تیکه‌سینی چربارکول گؤلونون یاخینلیغیندان تاپدیلار. تاپیلان تیکه‌لر یکاترینبورگ شهرینه یوللانیبلار.

 علوم آکادمیسی عضوی و بو هیأتین رییسی ویکتور گروخفسکی‌نین دئدیگینه گؤره، تاپیلان تیکه‌لر بو گؤی داشی‌نین 'کندرایت'لر نوعی و یا همان داش جینسیندن اولماسینی بللی ائدیب. اونون یوزده اونونو دمیر تشکیل وئریردی.

ویکتور گروخفسکی دئدی: بو گؤی داشی 'چرباکول گؤی داشی' آدلانیب. اونون کیچیک تیکه‌لرینی گؤلون قیراغیندا تاپدیغیمزا گؤره اصلی قطعه‌لری‌نین چرباکول سولاری‌نین درینلیگینده اولما احتیمالی وار.

مرّیخده حیات ایزلری تاپماغا بیر آددیم

مرّیخده حیات ایزلری تاپماغا بیر آددیم

کئچن ایلین آذرینده "کیپ کاناورال" فضایی مرکزدن گؤیه بیر اطلس راکتین توللانماسیله ایکی میلیارد یاریملیق پروژه‌نین سون مرحله‌سی باشلاندی. «گؤره‌سن مرّیخده حیات ایزلری وار؟» قدیمی سوآلینا جواب وئرمک اوچون.

دوققوز آی اون بیر گوندن سونرا "کیوریاسیتی" مریخ‌ گزنی موفقیّتله 2.4 کیلومتر خطایلا مریخین موشخص اولان نوقطه‌سینه یئندی.

"کیوریاسیتی" بوتون سوآللارا جواب وئره بیلمه‌سه‌ده یئردن کنارداکی حیاتین علامتلرینی تانییا بیلر.

کئچن هفته، حاضیرلاماسی آلتی آی چکن بیر پروژه‌نین ایجراسیله بو علامتلرین تاپیلماسینا اومید چوخالدی.

"کیوریاسیتی" مریخ گزنی بیرینجی دفعه اولاراق مریخین اوستواسینداکی قایالارین بیرینه نفوذ ائدیب آزماییشگاهی تحقیقلر اوچون نمونه گؤتوره ‌بیلدی. بو نمونه‌ده تحقیق ائله‌مگین، مریخ کؤره‌سی‌نین کئچمیشده حیاتین اولوب اولماماسی باخیمدان اهمیتی وار.

"کیوریاسیتی"، مریخین "گیل" جولاسیندا –مریخ اوستواسیندا درین بیر جولا- اؤز قازینتی‌سینی آپاردی. 6.4 سانتی متر درینلیگی و 1.6 سانتی متر ائنلیگینده بیر دلیک آچیب بوز رنگده یوموشاق پودر چیخارتدی.

بو، اینسانین آیری کؤره‌ درینلیگینه بیرینجی نفوذ ائتمه‌سیدیر.

بو دلیگین تصویرلری صاباحیسی گون یئره موخابیره اولدو.

 پروژه‌نین ارشد عالیمی پروفسور جان گروتیزینگر، بو نمونه گؤتورمگی، کیوریاسیتی‌نین مریخه یئنمه‌سیندن سونرا بو تیمین اَن بؤیوک موفقیّتی آدلاندیردی.

"کیوریاسیتی" مته‌سینی حاضیرلاماق آلتی آی چکدی. بو مته 2.2 مترلیک مریخ گزن روباتین قولونون آخیرینه قوشولوب. بو مته مریخ گزنین اون اساس علمی ابزارلاری‌نین آخیرینجی‌سیدیر.

پورتاغال قابیغیندان ارزیشلی شیمیایی مادّه دوزلیر

پورتاغال قابیغیندان ارزیشلی شیمیایی مادّه دوزلیر

بریتانیالی موحقیقلر چالیشیرلار بیر تکونلوژینی صنعتیلشدیرسینلر و میکرو دالغادان ایستیفاده ائدیب پورتاغال قابیغیندان ارزیشلی شیمیایی مادّه دوزلتسینلر.

یورک دانیشگاهی‌نین، تازالانانلارین توسیعه‌سی مرکزی‌نین تیمی، بونا اینانیرلار کی غذایی محصوللار و ائولرده اولان مادّه‌لردن ایستیفاده ائدیب اوجوز وجهله شیمیایی مادّه‌لر دوزلتمک اولار.

بو تحقیقاتی مرکزین مودیری، مگی اسمال وود دئییر: تکجه برزیلده، ایلده سککیز تون پوتاغال قابیغی تولید اولور. بونلارین یاریسی ائشیگه آتیلیر و بو مسأله اونلارین آرادان آپارما موشکولونو آرایا گتیریر. آما بو تکنولوژینی صنعتلشدیره بیلسک، پورتاغال قابیغی ارزیشلی شیمیای مادّه‌لره بؤیوک منبع اولاجاق.

یورک دانیشگاهی‌نین یاشیل شیمی تیمی‌نین اعضاسی طرفیندن تولید اولان بو تکنولوژی، میکرو دالغادان ایستیفاده ائدیب قابیغی اوکسیژنسیز بیر موحیطده قیزیشدیریر و یوخاری فیشار تولیدی ائدیر.

بو تکنولوژی اسید هیدرولیزینی چوخالدیر و اسید هیدرولیزینده، سلولوزی مولوکوللارینی شکله تبدیل ائدیر. بیر پروسه کی میکرو دالغاسیز ایمکانسیزدیر.

بو مرحله‌دن سونرا شیمیای مادّه‌لر او جومله‌دن لیمونئن (تمیزله‌ییجی محصوللاردا ایستیفاده اولونان عطیر مادّه‌سی) و پکتین (مورابّا حاضیرلانماسیندا ایشله‌نن ژل عامیلی) تولید اولور.

مارک پرونوون دئدیگینه گؤره، معمولاً پکتین مورابّادان باشقا هئچ زاددا ایشلنمز آما اونون تولیدی چتیندیر.

بو دانیشگاهین موحقیقلری بیر دستگاه دوزلدیبلر کی بیر ساعتده 30 کیلو پورتاغال قابیغینی گلیشدیریر و اومودلری وار بو تکونولوژینی میلیونلار تون قابیغی گلیشدیره بیله‌جک سطحده قاباغا آپارسینلار.

کؤهنه تکرله داغیدیجی توفانلاری آزالتماق اولار

کؤهنه تکرله داغیدیجی توفانلاری آزالتماق اولار

موحقیقلر داغیدیجی توفانلارین اثرینی آزالتماق اوچون ساده و اوجوز یول تاپیبلار کی ائله‌مک اولار کؤهنه ماشین تکرلری ‌ایله توفانین اثرین آزالتماق اولسون. کئچن هفته آمریکانین شرق ساحیللرینده باش وئرن سندی توفانی اونلار نفرلرین جانین آلیب و اونلار میلیارد دولار خسارت ووردو. ادینبورگ دانیشگاهیندان دریا موهندیسی «استفن سالتر» بیر طرح وئریب کی اوندا, مینلر تکری بیر-بیرینه باغلانماقلا اوزون پیلاستیک لوله‌لر یارانیر کی اوقیانوسون 100 متر درینلیگینده یئرلشدیریلیر. اوقیانوس سطحینده دالغالارین حرکتی, سطحده‌کی ایستی سویو اوقیانوسون درینلیگینه آپاریر. سالتر دئییر: «قاییدیلماز دلیکلردن ایستیفاده ائتسک, نتیجه‌ده اوقیانوس سویو یاخشیجا قاریشار و اوقیانوس سطحی‌نین حرارتی 26.5 سانتیقراد درجه‌دن آز اولار. بو همن حرارت میزانی‌دیر کی توفانلار اوندا تشکیل تاپار. اونون دئدیگینه گؤره دالغالارین انرژیسیندن ایستیفاده ائدیب اوقیانوس سطحی‌نین حرارتینی آزالتماق, اکولوژی نظردن منطیقلی ایشدیر. بو موحقیق اینانیر کی طبیعی صورتده ایشله‌ین پومپلاری توفان مسیرینده قوشماق اولار. توفان مسیری آتلانتیک اوقیانوسوندا ایستی مسیردیر کی لاپ خطرلی و لاپ داغیدیجی توفانلار اوردا تشکیل تاپیر و اوردان کئچیر.

نئچه دقیقه ایچینده نفت دوزلتمک

	نئچه دقیقه ایچینده نفت دوزلتمک
عالیملر تازا یول تابیلار کی آنا طبیعتین میلیونلار ایل بویوندا گؤردویو ایشی, یعنی یوسونلاری خام نفته چئویرمه‌نی, نئچه دقیقه‌نین عرضینده گؤرورلر. میشیگان دانیشگاهی‌نین موحقیقلری دئییرلر کی ائلیه بیلیبلر نئچه دقیقه عرضینده یوسونلاری سیخیب پیشیرسینلر و بو یاشیل یوسونون یوزده آلتمیشینی خام نفته چئویرسینلر. "فیل ساواژ" بو دانیشگاهین شیمی موهندیسلیک اوستادی دئییر: «چالیشیریق طبیعتین, دریا اورگانیزملرینی نفته چئورمک پروسه‌سینی تقلید ائدک. ساواژ و همکارلاری بیر پولاد لوله‌نی یاش یوسونلا دولدوردولار و آغزینی مؤحکم باغلادیلار و اونو 1000 درجه فارنهایت ایستیلیگینده اولان قومون آلتینا قویلادیلار. سونرا بو یوسونون حرارتی 550 درجه‌یه چاتاندا اونو ائشیگه چیخارتدیلار. یوسوندان یاناجاق دوزلدنلر بو ایش اوچون اوّلده یوسونو قورودورلار و سونرا اونون طبیعی یاغینی ایستیخراج ائدیرلر, آما اونون هر بوشقاسی‌ 20 دولارا چیخیر کی نیشان وئریر بو یاناجاغین بنزین پومپلارینا چاتماغا چوخ یولو وار. ساواژ دئییر: «شیرکتلر بیلیرلر کی بو ایقتیصادی یول دئییل. بو اوزدن بیر یول آختاریرلار کی یاش یوسوندان ایستیفاده ائله‌سینلر یعنی همن ایش کی بیز گؤردوک.» اونون دئدیگینه گؤره «فیشار اوجاغیندا» تولید اولان بو خام نفتده اصلی یوسونون انرژیسی‌نین یوزده دوخسانی وار.

اکینچیلیگین زلزله‌یه سبب اولماسی

	اکینچیلیگین زلزله‌یه سبب اولماسی
بیر آراشدیرمانین نتیجه‌لری, کئچن ایل اسپانیادا باش وئرمیش زلزله‌نین سببینی اکینچیلر طرفیندن قازیلان درین قویولاری بیلدی. بو آراشدیرمانین نتیجه‌لری مومکوندور کی تازا انرژیلرین ایستیخراجی و زیبیللرین محو ائله‌مه‌سی باره‌ده نیگرانچیلیقلاری چوخالتسین. 2011-جی ایلینده اسپانیانین لورکا شهرینده 5.1 ریشتر قودرتینده باش وئرن زلزله‌ده 300 نفر یارالانیب و 9 نفر اؤلموشدو. بو زلزله اسپانیادا سون 50 ایل بویو لاپ بؤیوک زلزله ساییلیر. کانادا، ایتالیا و اسپانیادان عالیملر, ماهواره تصویرلریندن ایستیفاده ائدیب بو نتیجه‌یه چاتدیلار کی بو زلزله بیر گؤلون یاخینلیغیندا بیر چاتلاما یارادیب کی 50 ایل بویوندا یئر آلتی سولارین ایستیخراجی اثرینده ضعیفله‌میشدی. بو مودّت بویو سویون سطحی 250 متر آشاغی یئنمیشدی, نیه کی اکینچیلر سویا چاتماغا گؤره داها درین قویولار قازمیشدیلار.

یئرین اکیزینی تاپماغا تازا اومیدلر

	یئرین اکیزینی تاپماغا تازا اومیدلر
تازا کشفلر, موحقیقلرین اومیدینی یئرینی اکیزینی تاپماغا کی اوردا یاشاییش اولسون, چوخالدیب. 1990 اون ایللیگین اوّل‌لریندن ایندیه‌دک یئره اوخشار 800 سیاره تانینیب و غیر موستقیم علامتلر بو سیاره‌لرده یاشاییش اولماسینا دلالت ائلیر, آما هله بو مسأله ثابیت اولماییب. عالیملر تازالیقدا بیر سیاره تاپیبلار کی یئردن دؤرد ایشیق ایلی فاصیله‌سی وار کی یئرین اکیزی تاپیلماسی باره‌ده اومیدلری چوخالدیب. ژنو رصدخاناسی‌نین موحقیقلری تأکید ائدیرلر کی تازا تاپیلان سیاره, اولدوزونا حددن آرتیق یاخین اولدوغونا گؤره, حیاتسیزدیر. آما بیر اولدوزون مداریندا بیر سیاره‌نین تاپیلماسی بو معنایا اولا بیلر کی آیری سیاره‌لر ده بو اولدوزون مداریندا اولسونلار و شاید اونلاردا حیات آثاری گؤروشدو. بونونلا بئله موحقیقلرین بونا اینانیرلار کی یئردن باشقا گؤیلرده جانلی‌لار اولموش اولسا دا و سیقنال گؤندرسه‌ده, 100 مین ایل ایشیق ایلی گئنیشلیگی اولان کهکشاندا اونو آلا بیلمه‌مک احتیمالی یئرینده قالیر.