موسلمانلاری عیزّتی و اونلارین آراسیندا قان تؤکمگین دایانماسینین تکجه یولو بیرلیک و ایسلامی تقریبدیر.
قورآن کریم، « واعتصموا بحبل الله جمیعا و لاتفرقوا» آیهسینده حبل (ایپ) کلمهسیندن ایستیفاده ائدیر. عرب ادبیّاتیندا قورآندان قاباق بو کلمهدن بو معنادا ایستیفاده اولماغین سابیقهسی یوخدور.
قورآن ایستیر دئسین داغیلمیش اومّت بیر اینسانا اوخشور کی قویویا دوشوب و گرک اؤزونو بو ایپله ائشیگه چیخاردا. بوردا دا بو نوکتهیه ایشاره اولور کی ایسلام اومّتی داغیلاندا تکجه ایلاهی ایپه چنگ وورماقلا نجات تاپا بیلر.
رحمتلیک کاشفالغطانین دئدیگی کیمی اینانیلمازدیر کی بیر نفر بیرلیگی ضررلی و داغیناقلیغی فایدالی بیلسین. نئجه کی 1355-جی قمری ایلینده «شیعه عصری» کیتابینین موقدّمسینده بو نوکتهنی خاطیرلادیبلار.
ایسلام اومّتی بیرلشیب واحید اولسا بو قان تؤکمهلر و ساواشلار قورتولار و موسلمانلارین ناموسلاری حیفظ اولار. بیرلیک کؤلگهسینده ایسلام تورپاقلارینا، بیگانهلرین حملهسی دایانار و موسلمانلارین عیزّتی حیفظ اولار.
بیز تقریب و بیرلیگه چاغیریریق آمّا بو تقریب تذویب معناسیندا دئییل. بیز بونو ایستهمیریک کی شیعه سونّیده ذوب اولوب اریسین. بیز چالیشیریق بوتون موشترک نوکتهلره تأکید ائلهمکله وحدته طرف گئدک و تفرقهلی مسألهلردن اوزاق اولاق. ایسلام اومّتینین اعتیقادلارینین یوزده دوخسانی موشترکدیر و بیز بو نوقطهلره تأکید ائلهسک وحدت حاصیل اولار.