دین خادیمی din xadimi
دین, حکایه, تکنولوژی و ساییر موضوعلاردا یازیلاردین خادیمی din xadimi
دین, حکایه, تکنولوژی و ساییر موضوعلاردا یازیلارایمام حسن عسکری (ع)
ایمام حسن عسکری (ع)
ایمام
حسن عسکری‌نین (ع) ایمامت دؤورانی سیاسی-ایجتیماعی جهتدن مخصوص بیر دؤوران ایدی.
بیر طرفدن عباسی خیلافتی ضعیفله‌میشدی و تورکلرین بیر عیدّه‌سی، خلیفه‌نین عزل و نصبینده گوجلری اولان حدّده، خیلافت دستگاهیندا نفوذ ائلیه بیلمیشدیلر. و بیر آیری طرفدن خیلافت علئیهینه اولان قیاملار باعیث اولموشدو عباسی‌لر چوخلو موشکوللرله اوز-اوزه قالسینلار. مخصوصاً زنگی‌لرین بصره‌ده‌کی قیامی کی عباسی خیلافتینی 14 ایل مشغول ائله‌دی.
بو احوالاتلا بئله، خیلافت دستگاهی ایمام حسن عسکری‌دن (ع) غافیل اولموردو، چونکی بیلیردی بو موقدّس وجود موسلمانلارین اون‌بیرینجی حقلی ایمامیدیر و پیغمبرین فرماییشینه گؤره اوندان سونرا ایمامتین آخیر حؤجّتی گله‌جک ایدی. ایمام حسن عسکری (ع) و کرامتلی آتاسی ایمام هادی‌نی(ع) نیظامی منطقه‌ده گؤز آلتیندا و حبسده ساخلاماقلاری بونا خاطیریدی کی ایمام حسن عسکری‌نین (ع) ائولنمه‌سینه و ایمام زمانین (عج) ویلادتینه مانع اولسونلار.
عباسی خیلافت دستگاهی چوخلو موشکوللرله اوز-اوزه قالماغینا رغماً ایمامی‌دا تماماً نظر آلتیندا ساخلامیشدی و او حضرتین مدینه‌یه قاییتماسینا ایجازه وئرمیردی.
ایمام عسکری‌نین (ع) بیر طرفدن وظیفه‌لری واریدی آتالاری کیمی اهل بیت (ع) معاریفی‌نین یایماسینا ایدامه وئرسین و آیری طرفدن‌ده حکومت مأمورلاری‌نین کونترولو و گؤزو آلتیندا حبس اولموشدو. بو اوزدن او حضرت دونیانین باشا-باشیندا اولان نوماینده‌لری ایله رابیطه قورماغا چتینلیک چکیردی و اونلارین بعضیسی ایله گیزلی قرارلار قویوردو.
حضرت بعضاً پیام و امر یوللاماق اوچون اؤز اعتیمادلی آداملارینی نوماینده‌لرینه طرف گؤندریردی و بعضاً اونلاری سامرایا چاغیریردی کی گلیب ایماملا گؤروشسونلر. آما بو گؤروشلر علنی یوخ بلکه گیزلی صورتده و طاباقچی و آل-وئرچی صورتینده اولوردی کی مأمورلار اونلارا شک ائله‌مه‌سینلر. اونلار او صورتده گلیردیلر و ایمام ظاهیرده آل-وئر اوچون و حقیقتده لازیم اولان امرلری وئرمک اوچون اونلارا یاخینلاشیردی و دانیشیردی و هابئله اونلارین سوآللارینا جواب وئریردی.
