اینسانلارین ایستعدادلارین چیچکلندیرمک اوچون تشویق اَن یاخشی یول ساییلیر و جماعتین ایصلاحینا چالیشان هر کس, گرک اؤیرنه کی اونلاری اؤز گوجلرینی تانیماغا و ایچلرینده آللاه طرفیندن ودیعه قویولان بؤیوک خزانهنی کشف ائلهمگه, تشویق ائده. اینسانلارین یاخشیلیقلارین دیله گتیرمک, اونلارین ایصلاحی اوچون اَن گؤزل یوللاردان ساییلیر. آما تأسوفله جماعتین چوخو اونون ترسهسین ائلیرلر، یعنی همیشه خطاکار اینسانین منفی طرفلرین و ایشلرین اونون یادینا سالیب اونو دانلیرلار و نظرلرینه بئله گلیر کی بو ایش باعیث اولار او, ایشتیباهلارین جوبران ائلهسین و منفی طرفلری اؤزوندن اوزاقلاشدیرسین. شکسیز بو ایش یا دوستلارلا و یا جماعتله ایشتیباهدیر. دوز یول بودور کی پیسلیکلری آرادان آپارماق اوچون یاخشیلیقلاری و گؤزللیکلری سایاق و جماعتی اونلارا طرف تشویق ائدک. مثلاً قارانلیغی آرادان آپارماق اوچون اونا یامان دئمکله و اونو دانلاماقلا بیر ایش گؤرمک اولماز، بلکه بیر شع یاندیرماق اونلاردان داها چوخ فایدالی اولار و بئلهلیکله قارانلیق آرادان گئدر. جامیعه موریدینده و جماعتین روحی و معنوی ایشلریندهده وظیفهمیز وار اونلارین ایچیندهکی قارانلیقلاری لعنتلهمک یئرینه، آرزو شمعلرینی اورکلرینده یاندیراق. بو ایش, اونلاری ایشقیلیغا طرف آپارماقدان علاوه باعیث اولار اؤزوموزهده آللاه یانیندا اجر اولسون. حضرت علی (ع) بویورور: هر کس بیر موسلمانی تعریفلهیه اونون اوچون اجر وئریلهجک». تعریفلهمکدن منظور اونون یاخشیلیقلارین سایماق و اونلارا طرف تشویق ائلهمکدیر. تعریفلهین اوچون، بو ایشین ایکی نتیجهسی وار: آللاه طرفیندن وئریلن اجر و جماعت طرفیندن قاییدان منفعت. جامیعه بیر آغاج کیمیدیر کی بیر شاخهسی آیری شاخهلره کؤمک ائلهسه حقیقتده آغاجا و اؤزونه کؤمک ائدیب. گرک اینسانلارین یادینا سالاق کی سنین ایچینده بؤیوک بیر شخصیت گیزلنیب و سن گرک اونو ائشیگه چیخاردیب پدیدار ائدهسن و اونون اؤلوب ایتمهسینه ایجازه وئرمیهسن. و بئلهلیکله تشویق و تعریفله اینسان قاباغا گئدر و ایچیندهکی انرژیلر آزاد اولار. گرک اینسانلارین یادینا سالاق کی اونلارین ایچینده خلیفةاللهلیق پوتانسییئلی وار و بیر اینسان کیمی اونو پدیدار ائلهمک اونلارین وظیفهسیدیر. خطاکار اینساندان اینتیقاد ائلهمک باعیث اولار او اولکودولسون و اعتیناسیز اولسون. خطاکار اینسانی تشویق ائلهمگین اَن یاخشی یولو بودور کی خطانین و ایشتیباه عملین اؤزوندن اینتیقاد ائدهسن آما خطاکارین شخصیّتینه توخونمایاسان. |