کانتی اخلاقلا ارسطویی اخلاقین، ایکیسینینده بوگون اوچون سؤزلری وار. کانت، اخلاقدا بوس-بوتون وظیفهیؤنوملو ساییر. کانت بو جهتدن وظیفهیؤنوملودور کی دئییر بیر داورانیشین دوز اولماسی اونون تکلیف و وظیفهایله موطابیق اولماسینا گؤرهدیر. حقیقتده اونون نظرینه بیر ایشین دوزلوگونون معناسی او عملین ائشیگینده یوخ بلکه اؤز ایچیندهدیر، و بو دقیقاً وظیفهیؤنوملولوگون اؤزودور. وظیفه یؤنوملو اولانلار بونا اینانیرلار کی بیر ایشین دوزلوگو اونون اؤز طبیعتینه گؤرهدیر نه آیری بیر زادا خاطیر. ارسطو فضیلتیؤنوملو اخلاقا اینانیر. اخلاقدا فضیلتیؤنوملولوک، اخلاقا ائله بیر باخیشدیر کی موختلیف تفسیرلری وار. بو باخیش بوتون تفسیرلریله اؤزونو مقصد یؤنوملولوک و وظیفهیؤنوملولوگه رقیب بیلیر و «فضیلت» و «کاراکتر» کیمی مفهوملارا تأکید ائلیر. تازا عصر، اخلاقی بئله تعریفلیر کی اخلاق دوز و ایشتیباه داورانیشلاردان دانیشیر. آما فضیلت اخلاقی، بو باخیشی دگیشدی و اخلاقین اساس سوآلینی یاخشی یاشاییش و اونون نئجهلیگینین اوستونه آپاردی. هم ارسطویی اخلاق و هم کانتی اخلاقین، بوگون اوچون سؤزلری وار. هر ایکی اخلاق حوزهسیندن نوکتهلر گؤتوروب بوگونکی عصرده ایشه سالماق اولار. اصلینده بو ایکی اخلاق حوزهسینه ائله باخمامالیییق کی اونلار بیر-بیرلریله دوشمندیلر. هر ایکی حوزه طرفدارلاری دانیشیقلاریندان بوگونکی عصریمیزه فایدالی نوکتهلر آلا بیلریک. |