ایمام هادی‌ (ع)

	ایمام هادی‌ (ع)
نقل اولوب کی خلیفه متوکلین یانیندا, ایمام هادینی (ع) سعایت ائله‌دیلر کی اونون ائوینده سلاح و آیری زادلار وار کی حکومت علئیهینه قیام ائله‌مگه حاضیرلاشیر. متوکل بو یالانا اینانیب بیر عیدّه‌نی یوللور کی او حضرتین ائوینی آختارسینلار. مأمورلار گئجه‌ یاریسی او حضرتین ائوینه تؤکولورلر آما بیر شئی تاپا بیلمیرلر. ایمامی بیر اوتاقدا تک تاپیرلار کی یون پالتار گئییب و دؤشه‌مه‌سی قوم اولان بیر یئرده اوتوروب و عیبادته مشغولدور. ایمامی همن وضعیتده خلیفه‌نین یانینا آپاریب دئدیلر: ائوینده بیر شئی تاپانمادیق و اونو اوزو قیبله‌یه و قورآن اوخویان حالدا گؤردوک. متوکل ایمامی گؤرن لحظه, ایمامین عظمتی اونو توتدو و ایختیارسیز او حضرته احتیرام ائله‌دی و اؤز یانیندا اوتورتدو و الینده‌کی شراب شوشه‌سیندن اونا تعاروف ائله‌دی ! ایمام آند ایچیب و بویوردو: منیم قانیما و اتیمه بئله بیر شئی قاریشماییب, منی معاف ائله ! خلیفه ال چکدی و دئدی: شعر اوخو ! ایمام بویوردو: من چوخ شعر ازبر دئییلم. آما خلیفه ایصرار ائتدی کی گرک اوخویاسان. ایمام بو مضموندا بیر شعر اوخودولار: «(موقتدیر حاکیملر) داغلار باشیندا گئجه‌نی گونوز ائله‌دیلر بیر حالدا کی گوجلو کیشیلر اوندان موغایات اولوردولار, آما داغ باشلاری اونلاری (اؤلومدن) قورتارا بیلمه‌دی. اونلار ایللر بویو عیزّتدن سونرا, امن یئرلریندن آشاغی چکیلدیلر و قبیرلرینه یئرلشدیلر, نه پیس ائو و نه پیس آرامگاه ! تورپاغا تاپیشیریلاندان سونرا, مونادیدن بیر نیدا گلدی: هاردادی او فاخیر تختلر, تاجلار و پالتارلار؟ هاردادی ناز نعمتده بسلنمیش اوزلر کی اونلارین احتیرامینا پرده‌لر آسیلاردی؟ قبیرلر اونلارین یئرینه دئیه‌رلر: ایندی یئر قوردلاری او اوزلرین یئمه‌سی اوستونده ساواشیرلار ! اونلار اوزون مودّت یئر اوزونده یئییب ایچدیلر؛ آما بوگون او هر شئیی یئیه‌نلرین اؤزلری حشره‌لرین و قوردلارین خورگی اولوبلار ! نه ائولر دوزلتدیلر کی اونلاری قوروسون, آما نهایتده بیر مودّت سونرا, بو ائولر و عاییله‌لری ترکیدیب قبر ائوینه قاچدیلار ! نه ماللار آنبار ائله‌دیلر, آما اونلاری ترکیدیب گئتدیلر و اونلاری دوشمنلرینه بوراخدیلار ! اونلارین آباد ائولری و سارایلاری خرابایا چئوریلدی و ساکینلری قارانلیق قبیرلره گئتدیلر !» متوکل چالیشیردی کی جماعت یانیندا ایمامین مقام و موقعیتینی یئندیرسین آما ایشلر اونون ضررینه و ایمامین نفعینه قورتولدو.