تراختور سوپر لیگ جاده‌سینده, یولونا احتیاطلی باشلادی

تراختور سوپر لیگ جاده‌سینده, یولونا احتیاطلی باشلادی

تراختورو 11 هفته بویونداکی اویونلارینا بیر باخیش سالاندا, تکجه ایکی اویون اودوزسا دا اوست-اوسته مطلوب نتیجه‌لر آلمادیغی اورتایا چیخیر. آما اوچ ایمتیاز آلیب, جدولین یوخاری باشیندا اوتوران تیمله فاصیله‌سینی یوخ ائتمک بو پارلاق تیمدن گؤزلنیله بیلن مسأله‌دیر.  گلین تراختورون 11 هفته بویونداکی اویونلارینا بیر نظر سالاق: بیرینجی هفته: تراختور سایپایا بیر ایمتیاز وئردی. تراختور اؤز ائوینده اویناسا دا اویونا احتیاطلی باشلادی و سایپا موقابیلینده هئچ هئچه برابر اولدو. ایکینجی هفته: تراختور پیکاندان بیر ایمتیاز آلدی. تراختورسازی پیکانلا بیر-بیره اولدو آما یئدیگی قول تراختورچولاری ناراحات ائتدی چونکی بو جور قول یئمک تراختورا یاراشمیردی. اوچونجو هفته: تراختور کرمان میسی‌نی آیاقلادی. اویونون ایکینجی یاریسی‌نین باشلانیشیندا تراختور 10 نفر اولسا دا حریفین عؤهده‌سیندن گله بیلدی و ایکی بیره غالیب گلدی. دؤردونجو هفته: تراختور تهرانین راه‌آهنین بیر هئچه دالیدا قویدو. بو اویوندا احسان حاج صفی گؤزل بیر قول ووردو. بئشینجی هفته: تراختور آبادانین نفتینه غالیب گلدی. بو اویونون آخیرلرینده تراختور ایقتیدارلا آبادانین نفت تیمینه اوچ ایکی‌یه غالیب اولدو و جدولین ایکینجی روتبه‌سینده یئر آلدی. آلتینجی هفته: تراختور بو اویوندا داور و ذوب آهن تیمینه اوتوزدو. اصفهاندا اوینانان بو اویون تراختورون ضررینه اولان آجی نتیجه ایله یعنی اوچ بیره ‌باشا چاتدیریلدی. بو اویوندا تراختورون موسلّم پئنالتیسی توتولمادی. یئددینجی هفته: تراختور بو اویوندا قومون صبا تیمی‌نین قارشی‌سیندا دایاندی. بو اویون تبریزه اولسا دا  هئچ هئچه باشا چاتدی. سککیزینجی هفته: تراختور و انزلی‌نین ملوان تیمی, بیر بیره موساوی اولدولار. ملوان تیمی اؤز قولونو پئنالتی نوقطه‌سیندن وورسا دا تراختور ایکینجی یاریدا اونو جوبران ائتدی. دوققوزونجو هفته: تراختور زاگروسون «گهر» تیمینی دارما-داغین ائتدی, بئش هئچه ! بو تیمین داها آرتیق قول یئمگه ایشتهاسی واریدی آما رقیب سوپر لیگدن کوسمه‌سین دئیه, تراختور اوندان آرتیق قول وورماق ایسته‌مه‌دی. اونونجو هفته: تراختور بیرینجی دفعه اولاراق شیرازین فجر سپاسی تیمینه اوتوزدو, بیر هئچه. شراییط او جومله‌دن اویون میدانی تراختور سئون شراییط دئییلدی. اون بیرینجی هفته: تراختور یئنه‌ده تهرانین نفت تیمینی اودانمادی, بیر بیره. اویونون باشلانیشیندا تراختور بیر هئچه قاباغا دوشموشدو آما بو غالیبیّتی ساخلایا بیلمه‌دی. تراختور دالیدا قویدوغو 11 اویوندا: 4 اویون اودوب 5 اویون موساوی اولوب 2 اویون اودوزوب  و بو گون تراختور 15 قول ووروب و 10 قول یئمکله 17 ایمتیاز الده ائدیب و جدولین یئددینجی روتبه‌سینده دایانیب. تراختور اون ایکینجی اویونونو تبریزده و تهرانین ایستیقلال قارشی‌سیندا اوینایاجاق. تراختور و ایستیقلال بیرینجی دفعه 1354-ده اویناییبلار و او اویوندا تراختور بیر هئچه غالیب اولوب. اون ایکینجی لیگده تراختور 17 ایمتیازلا جدولین یئددینجی روتبه‌سی و ایستیقلال 19 ایمتیازلا جدولین دؤردونجو روتبه‌سینده یئر آلیبلار.