صاباح دونیا داغیلیرمی؟

	صاباح دونیا داغیلیرمی؟
ناسا گله‌‌جکدن قورخولو خبر وئریب. صاباح دونیانین سونو اولا بیلر. ناسا 2009-جو ایلدن 2012-جی ایلین دونیانین سون اولا بیلجگی حاقیندا خبردارلیق‌لاری ائتمگه باشلاییب. او واخت هله گونشین فعاللیغینی اؤیرنن گروهون موتخصیصلری اؤزلری‌نین قورخودوجو حساباتلارینی درج ائتمیشدیلر: اونلار دونیا سطحینده خطری, گونشدن گؤزله‌دیک‌لرینی دئییب‌لر. اونلارین سؤزلرینه گؤره، گؤرونمه‌میش سطحده اولان پارتلاییش, هسته‌ای ساواش ایله موقاییسه ائدیله بیلر. بو 2012-جی ایلین سپتامبرین 22-ده - یعنی صاباح باش وئرمه‌لیدیر. گونشده‌کی پارتلاییشلارلا باغلی یئر کوره‌سی‌نین الکترو مغناطیس ساحه‌سینده‌کی دگیشیک‌لیک گوجلو الکتریک آخینی یارادا‌جاق. موتخصیص‌لرین حسابلاما‌لارینا گؤره، بوندان 90 ثانییه سونرا آمریکادا 300 اساس ترانسفورماتور یانا‌جاق. نتیجه‌ده 130 میلیون اینسان الکتریکسیز قالا‌جاق. قاتارلار، آسانسور‌لار و صنایع دایانا‌جاق، طیّاره‌لر یئره دوشه‌جک، سو و ایستیلیک تهجیزاتی دایانا‌جاق. رادیو سوسا‌جاق، تیلویزیونلار گؤسترمه‌یه‌جک، رابطه ایته‌جک... بو خطرلی گله‌جکدن قورخان آمریکا‌لی‌لار حتی 2010-جو ایلده فضایا مخصوص ماهواره - «سدو» گؤندریبلر. او، بئش ایل عرضینده گونشی ایزله‌یه‌جک، اونون تصویرلرینی گؤتوره‌جک و دقیقه‌ده 60 تصویر گؤندره‌جک. تصویرلرین کیفیتی  16 میلیون پیکسئلدیر. دوزدور، هله‌لیک «سدو» قورخولو هئچ نه گؤندرمه‌ییب، بونا گؤره ده یئرده‌کی ساکینلری خطر باره‌ده خبردار ائتمه‌ییبلر. قاباقدا دا بیر گون وار. روسیانین دولت دانیشگاهی‌نین رصدخاناسی‌نین مودورو، فیزیک-ریاضیات علملری دوکتورو سرگئی یازئو ناسانین پیش‌بینلیغینی غیری حرفه‌ای آدلاندیریب. "دونیادا هئچ کیم گونشده‌کی پارتلاییشلاری هئچ بیر آی اوّلدن دئیه بیلمز، هله قالدی 3 ایل اؤنجه‌دن". اونون سؤزلرینه گؤره، ایندی گونشده فعاللیق چوخ یوکسک سطحده دئییل. "اعتراف ائدیم کی، بیر موتخصیص کیمی ایندی منه اورایا باخماق بئله ماراقلی دئییل. گونشده ایندی‌ده لکه‌لر وار، آنجاق اونلار ائله‌ده بؤیوک دئییل.» روس موتخصیص بیلدیریب کی، هئچ بیر جیدی ژئوفیزیک موتخصیصی بو پیش‌بینلیقلا راضی‌لاشا بیلمز. بیزیم ایشیقسیز قالماغیمیز اوچون هله هئچ واخت گؤرمه‌دیگیمیز پارتلاییش لازیمدیر.»