یئرکؤکو یئمک سوموک سینما‌نین قاباغین آلار

	یئرکؤکو یئمک سوموک سینما‌نین قاباغین آلار
سنگاپورلی موحقیقلر بیلدیلر کی یئرکؤکو یئمک, کیشیلرده سوموک سینما‌نین قاباغین آلار. Osteoporosis International مجله‌سی‌نین یازدیغینا گؤره, سنگاپور دانیشگاهی‌نین بهداشت ویزارتی موحقیقلری بیر تحقیقده, کارتنویید عاییله‌سیندن اولان ساری میوه و گؤیلر, باره‌سینده تازا بیلگیلر تاپیبلار. کارتنوییدلر یاغدا حل اولان طبیعی رنگ‌وئرنلردیلر کی چوخراق بیتکیلرده, یوسونلاردا و فتوسنتز ائدن باکتریلرده اولارلار. کارتونییدلر میوه‌لر, گوللر و یارپاقلاردا ساری, قیرمیزی و نارینجی رنگلرین عامیلیدیلر. بو تحقیق گؤرسدیر کی یئرکؤکویه تای بتاکاروتنلی میوه و گؤیلری یئمک –کی بدنده A ویتامینینه تبدیل اولور- آریق کیشیلرده اومبا سومویونون سینماسی‌نین قاباغین آلیر و بو بیر حالدادیر کی همن میوه و گؤیلرین خانیملاردا بو تأثیری اولمور. بدنده بتاکاروتن ذخیره‌سی کیفایت قدر اولماسا, مودافیعه سیستمی ضعیفلر و ناخوشلوقلارین قاباغین آلا بیلمز و بئله‌لیکله بدن جور به جور عفونتلر معرضینده اولا بیلر. توت ساری, نارینجی و قیرمیزی اولان میوه و گؤیلرده بتاکاروتن چوخ اولار و اوندان علاوه یاغ و کالوریلری آز اولار. میوه و گؤیون نه قدر قیرمیزی, نارینجی و ساری رنگی توت اولسا, اونون بتاکاروتنی داها چوخدور.