ائوده‌کی زلزله تدبیرلری

	ائوده‌کی زلزله تدبیرلری
هرکس بیلیر کی اولکه‌میز زلزله خطینده یئرلشیر. بو دوروم, زلزله‌یه قارشی حاضیرلیقلی اولمامیزین گرکلی اولدوغونو گؤستریر. زلزله‌نین نه زمان اولاجاغی هله هئچ کسین طرفیندن اؤن گؤروله بیلینمیر. بو دا هر آن زلزله اولاجاق کیمی همیشه تدبیرلی و حاضیر اولمامیزی گرکلی ائدیر. طبیعتاً همیشه بئله بیر گؤزله‌مه ایچینده اولماق اینسانلاری روحی جهتدن اذیت ائدر. دئمک ایسته‌دیگیمیز بودور کی ائولریمیز همیشه زلزله‌یه حاضیر اولمالیدیر. آلدیغیمیز بعضی ساده تدبیرلر باعیث اولار احتمالی زلزله‌ده اَن آز ضرری گؤرک. بو ساده تدبیرلر نه‌دیر؟ 1. بیرینجی بودور کی ائویزی حتماً زلزله قارشیسیندا بیمه ائدین. بونو ائله‌مه‌سز بؤیوک مادی ضرر گؤره بیلرسیز. 2. زلزله‌ اثرینده دنگه‌سینی الدن وئریب ییخیلا بیلن اشیالاری یئره و یا دیوارا برکیدین. چوخلاری زلزله زمانی ییخیلان ویترین کیمی اشیالارین اثرینده یارالانیر. عین زماندا چوخ سئودیگیمیز اشیالارا دا بؤیوک ضرر گلر. 3. آپارتومان ائولرده زلزله زمانی پنجره‌دن حیاطه چیخماق ایمکانی یوخدور. بونا گؤره پالتار یویان ماشینی, یخچل کیمی وساییلین -کی سیزی زلزله زمانی قورتارا بیلر- اطرافینی بوش قویون. زلزله زمانیندا بو اشیالارین اطرافیندا جنین فورموندا اوتوروب گؤزله‌یین. 4. ایمکانیزدا اولسا برق, سو و قازی قطع ائله‌ماق اوچون اوتوماتیک سیستملردن ایستیفاده ائدین. بو ایشله زلزله زمانی میدانا گلن حادیثه‌لرین چوخونون قارشی‌سینی آلمیش اولورسوز. 5. زلزله زمانی پیلّه‌لردن, پنجره‌لردن, ییخیلان اشیالاردان و بالکونلاردان اوزاق دورون. 6. یاتاق و تختلریزی پولاد قفس آلتینا آلا بیلرسیز. 7. یئنی ائو تیکدیرسیز و یا یئنی ائو آلسیز یئر و مصالح باخیمیندان زلزله قارشی‌سیندا موقاویم اولماسینا دیقّت یئتیرین. 8. ائوده راحت ال چاتا بیلن یئرده ایلکین کؤمکلر کیفی ساخلایین. بو کیفین ایچینده ایلکین کؤمکلر لوازیمی, ال چیراغی, ایمکانی اولسا بیر چادیر, یاتما کیسه‌سی, حصیر, کالوروسو چوخ اولان قورو یئمکلر (قورو اوزوم و . . .) و ایضافه باتری کیمی زلزله زمانی لازیم اولان وساییل ساخلایا بیلرسیز. ایمکانی اولسا بو کیفی چیخیش قاپی‌یا یاخین قویون. 9. عاییله‌زله زلزله زمانی نه ایشلر گؤره‌جگیزین نقشه‌سین چکین. حتّا بونو نئچه دفعه تمرین ائدین. 10. ایلکین کؤمکلری اؤیرنین. 11. حتماً ائویزده بیر اود سؤندورن کپسول ساخلایین و اونو مونظم اولاراق شارژ ائدین. 12. ائوده‌کی سینان اشیالاری اوجا یئره قویمایین. 13. عاجیل و ایضطیراری شوماره‌لرین لیستینی یازیب الده قویون و ائلیه بیلسز ازبرله‌یین. 14. رسمی یئرلرین خبرلرینی زلزله موریدینده تعقیب ائدین و ایمکانیزدا اولسا اونلارین قوردوغو کیلاسلار و دؤره‌لرده شیرکت ائدین. 15. یادیزدا اولسون زلزله زمانی سیزه بیر شئی اولماسا دا, قونشولاریزین و یا آیری اینسانلارین کؤمگه احتیاجی اولا بیلر. زلزله‌سیز بیر دونیا آرزولاریق آما طبیعتین بو آرزوموزو بوشا چیخارتدیغینی بیلیریک. بونا گؤره همیشه زلزله‌یه حاضیر اولمالی‌ییق.