قوربان بایرامیز موبارک اولسون

	قوربان بایرامیز موبارک اولسون
قوربان سؤزو, معنا جهتدن یاخینلاشما آنلامیندادیر. یعنی اینسان آللاها یاخینلاشماق اوچون بیر وسیله‌دن ایستیفاده ائدیر. ایسلامی منبعلره اساساً اینسان تاریخینده بیرینجی قوربانلیغی حضرت آدمین (ع) اوشاقلاری یعنی هابیل و قابیل وئردیلر کی قابیل بیر آز بوغدا و هابیل بیر قوچ آللاهین درگاهینا یاخینلاشماق اوچون قوربان وئردیلر. هابیلین نیّتی و اعمالی دوز اولدوغو اوچون اونون قوربانی قبول ائدیلدی و قابیلین‌کی رد اولدو.   قورآن کریم بو باره بئله بویورور: پس اونلار ایکیسی قوربان وئردیلر, بیریندن قبول ائدیلدی و او بیریندن قبول ائدیلمه‌دی. «اذ قربا قربانا فتقبل من احدهما و لم تقبل من الاخر» (مائده 27) آما بو گون بیز قوربان بایرامی کیمی عزیز سایدیغیمیز گون او گونه موصادیفدیر کی حضرت ابراهیم (ع) آللاه یولوندا بیر قوچ قوربان ائله‌دی. حضرت ابراهیم (ع) ائولاد صاحیبی اولموردو و همیشه آللاه درگاهینا دوعا ائدیردی آللاه اونا صالح ائولاد نصیب ائله‌سین. (رب هب لی من الصالحین) بیر حالدا کی حضرت ابراهیمین (ع) 86 یاشی واریدی آللاه تعالا اونون دوعاسینی موستجاب ائدیب اونا اسماعیلی وعده وئردی (فبشرناه بغلام حلیم) حیرت آمیز یوخو حضرت اسماعیل(ع) یئنی‌یئتمه‌لیک یاشلارینا چاتاندا حضرت ابراهیم (ع) حیرت آمیز بیر یوخو گؤرور. او یوخودا گؤرور کی آللاه طرفیندن امر گلیب کی تکجه اوغلونو آللاه یولوندا ذیبح و قوربان ائله‌سین. (البته دیقّت یئتیرمک لازیمدیر کی پیغمبرلردن سووای هئچ کسین یوخوسو بو معنانی داشیماز) ابراهیم ماجرانی اوغلونا دانیشیر. فلما بلغ معه السعی قال یا بنی انی اری فی المنام انی اذبحک فانظر ما ذا تری؛(صافات 102) «او چالیشما یاشینا چاتاندا, دئدی ائی منیم بالام من یوخودا گؤردوم کی سنی ذیبح ائدیرم, سنین نظرین نه‌دیر؟» حضرت اسماعیل‌ده بو سیناقدان باشی اوجا چیخدی. قَالَ یَا أَبَتِ افْعَلْ مَا تُؤْمَرُ سَتَجِدُنِی إِنْ شَاءَ اللَّهُ مِنْ الصَّابِرِینَ؛(صافات 102) «دئدی: آتا جان! امر اولدوغونا عمل ائت, آللاه ایسته‌سه منی صبر ائدنلر سیراسیندا گؤره‌جکسن.» فَلَمَّا أَسْلَمَا وَتَلَّهُ لِلْجَبِینِ. وَنَادَیْنَاهُ أَنْ یَا إِبْرَاهِیمُ. قَدْ صَدَّقْتَ الرُّؤْیَا إِنَّا کَذَلِکَ نَجْزِی الْمُحْسِنِینَ. إِنَّ هَذَا لَهُوَ الْبَلَاءُ الْمُبِینُ. وَفَدَیْنَاهُ بِذِبْحٍ عَظِیمٍ. وَتَرَکْنَا عَلَیْهِ فِی الْآخِرِینَ(صافات 103- 108) «هر ایکیسی تسلیم اولاندان سونرا اونو آنلی اوسته آتدی. بیز نیدا ائله‌دیک کی ائی ابراهیم ! سن یوخونا عمل ائله‌دین و صادیق اولدون و البته کی بیز یاخشی عمللی اینسانلارا پاداش وئره‌ریک. بو آشکار بیر سیناق ایدی. و اونو بؤیوک ذیبحله آلدیق و اونون یاخشی آدینی گله‌جک نسله بوراخدیق.» بئله‌لیکله آللاه اسماعیلین یئرینه آیری قوربان گؤندردی.