آتا آنا اعتیادی‌نین اوشاقلاردا بوراخان تأثیری

	آتا آنا اعتیادی‌نین اوشاقلاردا بوراخان تأثیری
عاییله عضولری‌نین سیقار, موخدیره مادّه‌لر و ...اعتیادی اوشاقلارا اثر قویور. هر چند بیر نفرین اعتیادیندان عاییله‌نین بوتون عضولری ناراحات اولارلار, آما اونون منفی تأثیری اوشاقلارا داها چوخ اولار. بو اوشاقلار ائوده هرکی-هرکیلیک و اؤندن‌ بللی اولمایان شراییطله اوز به اوزدولر و بو مسأله اونلارین ایندیکی و گله‌جک یاشاییشلاریندا موشکول یارادار. آتا آناسی مؤعتاد اولان اوشاقلار بو موشکول‌لرله اوز به اوز اولارلار: اؤرگشمه گوجونون آزالماسی, فیزیکی ناخوشلوقلار, روحی ناخوشلوقلار, چاقلیق و اطرافا گؤره دیقّتین آزالماسی اوشاغین کیرداریندا منفی تأثیر آتا آنانین اعتیادی اوشاغین کیرداریندا پیس تأثیر قویار کی اونلارین بعضی‌سینه ایشاره ائدیریک: مؤعتادلارین یاشاییشی عادی اینسانلارلا چوخ فرقلی اولور. بوجور عاییله‌لرده اوشاقلار ائوده خشونت, جیسمی و جینسی سوءایستیفاده, روح دوشگونلویو, روحی ناخوشلوقلار, طلاق و . . .زادلارا شاهید اولورلار و اونلاردا بو ایشلری گؤرماغا تمایول, چوخ اولار و شیدتلی صورتده ایضطیراب, روح دوشگونلویو و حتّا اینتیحار معرضینده اولارلار. اکثر زمانلار اونلارین بو رفتارلاری ائودن ائشیگه‌ده مونتقیل اولار و اونلار اؤز یاشیتلاری‌ایله چوخ چتین رابیطه قورا بیلرلر و معمولاً غیر ایجتیماعی و اوتانجاق افرادا تبدیل اولارلار. اوشاقلیق دؤره‌سینی یاددان چیخارتماق وضعیت چوخ پیس اولان زمان, آتا آنا اوشاغین اساسی ایستکلرینه دیقّت ائله‌مزلر و اونلار مجبور قالارلار مدرسه‌نی بوشلاییب و برنامه‌سیز یاشایالار. بعضاً بالاجا کیشیلره و خانیملارا چئوریلرلر کی مجبوردولار عاییله‌نین و یا کیچیک باجی قارداشین مسئولیّتینی بویونلارینا آلالار. گوناه حیسّی بعضاً آتا آنا اوشاغین اوستونه قیشقیراندا, او اؤزونو ائوین بوتون حادیثه‌لرینه گؤره گوناهلی بیلیر. بو حیسّ اونون گله‌جکده‌کی رفتارلارینا اثر قویور. آتا آنانین دیقّتسیزلیگی چوخ واختلار حتّا آتا آنانین فقط بیری مؤعتاد اولاندا, آتا و یا آنا اوشاغا کیفایت قدر دیقّت یئتیره بیلمیر, نیه کی بوتون دیقّتی اؤز موشکولونه مصرف اولور. اوشاغا دیقّتسیزلیک اونون روح دوشگونلویو و آیری موشکوللرینه سبب اولا بیلر. اوشاغین خشونتی بئله عاییله‌لرده اوشاقلار همیشه آتا آنانین داعواسینا شاهید اولورلار و اؤزلری‌ده جیسمی و یا روحی سوءایستیفاده معرضینده اولورلار و بو شراییط اونو روحی و یا جیسمی ناخوشلوغا چاتدیرا بیلر. اؤزونه اینمانماماق آتا آنانین بیری مؤعتاد اولان عاییله‌لرده, اوشاقلار همیشه ساکیت اولمالیدیلار کی آتا آنانی حیرصلندیرمه‌سینلر؛ بونا گؤره قورخاق و اؤزونه اینانمایان اولارلار و هر شئیدن و هر کسدن قورخارلار. اؤزگه‌نین ریضایتی مؤعتاد آتا آنانین اوشاقلاری چالیشارلار ساکیت اولسونلار و اونلاری راضی ساخلاسینلار. بئله اولاندا اونلار گله‌جکده ده هامینی اؤزلریندن راضی ساخلاماغا چالیشاجاقلار و هئچ کسه یوخ دئمک جورأتلری اولمایاجاق, مخصوصاً گوجلو آداملارا؛ بئله‌لیکله اؤز هویّتلرین الدن وئره‌جکلر. اوشاقلار بوجور عاییله‌لرده یالان دانیشماغی, خیانتی, اوغرولوغو و آیری جورملری اؤرگشیرلر. اوشاغین مؤعتاد اولما احتیمالی مؤعتاد آتا آنانین اوشاقلاری همیشه اعتیاد معرضینده‌دیلر و بونا گؤره اونلارین مؤعتاد اولما احتیمالی چوخ یوخاری اولور. آیریلارینا اینانماماق بو اوشاقلار اوتانجاق اولدوقلاری اوچون دوستلاری ایله چوخ آز رابیطه‌لری اولور و یاشاییشلاری معمولاً گیزلی اولار. بئله‌لیکله هئچ کسه اینانمازلار و بو اینانماماق اونلارین گله‌جکده‌کی رابیطه و یاشاییشلارینا منفی تأثیر قویار.