نیه قیزلار ائولنمیرلر؟

	نیه قیزلار ائولنمیرلر؟
اطرافیمیزدا اولان سوبایلارین چوخ آزی منطیقلی و مؤحکم سببلره گؤره سوبای قالماغی ترجیح وئریرلر و او بیریلری بو شراییطی مجبوراً و یالانچی سببلره گؤره تحمّول ائدیرلر. بو افرادین فورصتلره «یوخ» دئمکلری‌نین اصلی عامیلی عادتلر و قورخولاردان قایناقلانیر. سیز ده اوخشار دلیل‌لره گؤره سوبایلیق عالمینده قالمیش اولساز, یاخشی اولار یاشاییشیزا بیرده باخاسیز و منطیقلی دلیل‌لر اساسیندا تازادان تصمیم توتاسیز. ایشله‌مگی حددن آرتیق سئویرسیز؟ شاید ایشله‌مگی او قدر سئویرسیز کی ایش موفقیّتینی هر شئیدن اوستون توتورسوز. بیر عیده‌ وار کی قیرخ-اللی یاشلارینادک میزلری اوستونده‌کی پرونده‌ایله  یاشیرلار, گؤره‌سن اونلار دوغرودان‌دا خوشبختدیلر؟ چاره‌سی نه‌دیر؟ سیز بیر خانیم اولساز کی ایندیه‌دک بوتون یاشاییشیز ایشیز اولوب. قرار دئییل کی ائولنمک همن خانه‌نیشین اولاسیز. اؤزوزه ائله بیر کیشی سئچمه‌لیسیز کی سیزین ایشیزی درک ائده و شراییطی نظرده آلا. اگر ایسته‌میرسیز کی یولون یاریسیندا هم اؤزوزو و هم اونو نا اومید ائده‌سیز, پس چالیشین کی سیزه گلن ائلچی‌یه هدفلر و شراییطیزدن دقیق تصویر وئره‌سیز. و البته بو کیفایت ائله‌مز. سیز اؤزوز ده دگیشمگه حاضیر اولمالیسیز. سیز قبول ائله‌مه‌لیسیز کی ائولَنَندن سونرا شراییط دگیشه‌جک و قاباقکینا تای اولمایاجاق. ائله ایستانداردلاریز وار کی اونلاری دگیشمگه حاضیر دئییلسیز؟ شاید گله‌جک یولداشیز باره‌ده مؤحکم معیارلاریز وار کی اونلار سیزین اوچون حیاتی ساییلیرلار. احتیمالاً سیز اطرافیزداکی کیشیلرین ایرادلارین گؤرورسوز و اورگیزده دئییرسیز کی من اولسام بئله کیشی ایله  ائولنمزدیم. و اوردان کی سیزین ده ائلچیلریز همن بو یئر کوره‌سیندندیلر و اونلارین‌دا بوجور عیبلری اولا بیلر, اونلارا «بلی» دئیه بیلمیرسیز. چاره‌سی نه‌دیر؟ صؤحبت بیر عؤمور یاشاماقدان گئدیر. حتماً سیزین معیارلاردان بیگانه بیرینه «بلی» دئیه بیلمزسیز. آما بو معیارلارا گؤره تک قالماغی بوینوزا آلمامیشدان قاباق اؤزوزه و معیارلاریزا دیقّتلی باخین. اوّلده اؤز ضعفلریزی و ایرادلاریزی نظرده آلین. سونرا سیزی بیر عؤمور تک ساخلایان معیارلاری اهمیّت ترتیبی ایله یازین. باخین گؤرون بو خصوصیتلرین هانسی‌سیندان واز کئچه بیلرسیز. و هانسیلاری واز کئچمه‌لی دئییل. ایندی ائلچیلریزه باخین. شاید اونلارین بیرینده منفی خصوصیتلرین نئچه‌سی اولا آما اونون شخصیتی‌نین اساس حیصه‌سی اولمایا. اوندا اولان بو خصوصیتلرین رنگی آز اولسا شاید یاخشی اولار بو موریدده آرتیق دوشونه‌سیز. دوستلاریزلا اولماق سیزه کیفایت ائلیر؟ دوستلارسیز یاشایا بیلمه‌ین اینسانلار اوچون ائولنمک محدودیّت معناسیندادیر. اونلار قبول ائیله بیلمزلر کی ائولنَندن سونرا, دوستلاری‌نین دؤره‌سینه خط چکمه‌لیدیلر. چاره‌سی نه‌دیر؟ بئله بیر اینسان اولساز, ائولنمک سیزه چتین گلر. آما یاخشی اولار بیر مودّت سونرانی دوشونه‌سیز. بو صمیمی دوستلار ها واختادک سیزینن اولاجاقلار؟ تجروبه نیشان وئریب کی اینسانلاری بیر-بیرینه باغلاماغا داییمی و موشترک منفعتلر لازیمدیر کی دوست گروهوندا بو مسأله دواملی اولماز. البته ائولنمک دوستلاردان قیریلماق معناسیندا دئییل. داها یاخشی موقعیّت آختاریرسیز؟ نظریزه بئله گلیر کی بیرینه «بلی» دئمک او بیریلره «یوخ» دئمک معناسیندادیر و بونا خاطیر تصمیم توتانمیرسیز؟ شاید بئله گومان ائلیرسیز کی داها یاخشی فورصتلر قاباغا گله‌جک و سیزین لیاقتیز بوگونه‌دک اولان ائلچیلریزدن داها یوخاریدیر. چاره‌سی نه‌دیر؟  داها یاخشی موقعیته قطعی حؤکم صادیر ائله‌مک اولماز. شاید سیزین حقّیز اولا و ایندی‌کی ائلچیلریزدن داها لیاقتلیسی اولا. آما بیر آز منطیقلی باخساز گؤره‌جکسیز کی اولا بیلر همان لیاقتلی ائلچی گله و سیز اوندان‌دا لیاقتلینی گؤزله‌مک باهانیسنا اونا دا یوخ دئیه‌سیز!  اَن یاخشی اولماق فیکرینی باشیزدان آتین. یازدیغیز اولویّتلره باخین و چالیشین او اساسدا اینتیخاب ائده‌سیز. بوندان کی بیر واقعیتی بیلسین قورخورسوز؟ شاید سیزین و خانیواده‌زین چوخلی فرقی اولا. شخصی عقیده‌لردن توتدی ایجتیماعی یاشاماق سبکلرینه‌دک. خانیواده‌نین سیزه پیشنهاد ائله‌دیگی ائلچی سیز دئیَن دئییل و سیزی تانییان آیری ائلچی خانیواده‌زی تانیمیر. نظزریزه بئله گلیر کی خانیواده‌ تانیتدیران ائلچی‌یه «بلی» دئسز بیر عؤمور یازیق اولاجاقسیز و خانیواده‌زی تانیمایان ائلچی‌یه «بلی» دئسز خانیواده‌زدن آیری و اوزاق قالمالی اولاجاقسیز. چاره‌سی نه‌دیر؟ کیریخمایین. ائولنمک بوتون بیر پاکت کیمیدیر کی ایچینده‌کیلرین بعضیسینی سئچه بیلمزسیز. سیزین دوستلاریز و خانیواده‌ز و اونون دوستلاری و خانیواده‌سی بو پاکتین ایچینده‌دیر. ایسته‌سز کی موفّق یاشاییشیز اولسون بو شراییطین هامیسی ایله اوز به اوز اولمالیسیز. ائلچیلریزه خانیواده‌زین شراییطی باره‌ده دانیشین و فرقلری آیدینلادین. اونا دئیین کی خانیواده و رابیطه‌لریزی ساخلاماق سیزه اساسلی اهمیتی وار و سیزین کناریزدا خوشبخت اولماق ایسته‌سه بو فرقلری قبول ائتمه‌لیدیر. بئله فیکیر ائله‌مه‌یین کی بو خط نیشان چکمکله اؤزوزو ارزیشدن سالیبسیز. عزیزلریزه و شراییطیزه وئردیگیز اهمیّت, اونون نظرینده سیزین ارزیشیزی نئچه برابر ائلیر.