آغاج و اوغلان

آغاج و اوغلان

قدیم زمانلار بیر بؤیوک آلما آغاجی واریدی. و بالاجا اوشاق واریدی کی گلیب او آغاجین اطرافیندا اویناماغی سئوردی. اونون اوستونه دیرماشیب میوه‌سیندن یئیردی و کؤلگه‌سینده یاتاردی. اوغلان او آغاجی او قدر سئوردی کی ائله بیل آغاج‌دا اونونلا اوینور. زمان سووشدو و اوغلان بؤیودو و داها قاباقکیلار کیمی اونون اطرافیندا اویناماغا گلمه‌دی. بیر گون جوان آغاجین یانینا گلدی و غملی گؤروشوردو. آغاج اونا دئدی: «گل منله اوینا!» اوشاق جواب وئردی: «من داها اوشاق دئییلم, من داها آغاج اطرافیندا اویناماغا گلمه‌میشم. آیری اویناتمالی ایستیرم و اونو آلماغا پولا احتیاجیم وار.» آغاج جواب وئردی: «موتأسیفم, منیم پولوم یوخدور. آما ائلیه بیلرسن منده اولان بوتون آلمالاری دره‌سن و اونلاری ساتماغینان پول قازاناسان.» جوان چوخ سئویندی و آلمالارین هامیسینی دریب سعادته چاتدی. جوان آلمالاری دریب گئدندن سونرا قاییتمادی و آغاج غوصّه یئییردی. گونلرین بیر گونو همان جوان قاییتدی و ایندی کیشی اولموشدو. آغاج چوخ سئویندی و دئدی: «گل منله اوینا !» یئنه گؤزلنیلن جواب, ایمتیناع اولدو: «منیم اویناماق گوجوم قالماییب, عاییله‌مه گؤره ایشله‌مگیم لازیمدیر. بیزیم بیر ائوه احتیاجیمیز وار کی اوندا اوتوراق. منه کؤمک اولا بیلرسن؟» آغاج جواب وئردی: «موتأسیفم منده ائو یوخدور. آما ائلیه بیلرسن منیم بوداقلاریمی کسه‌سن و اؤزونه ائو دوزلده‌سن !» کیشی آغاجین بوتون بوداقلارینی کسدی و سئویندی. آغاج اونو سئوینجاق گؤرنده شاد اولدو. آما کیشی یئنه اونا قاییتمادی و آغاج تازادان تک قالدی و غوصه‌یه جومدو. گونشلی و ایستی بیر گون کیشی قاییتدی و آغاج اونو گؤرمکدن سئوینیب همیشه‌یه تای, دئدی: «گل منله اوینا !» کیشی جواب وئردی: « من یاشلی بیر آدامام و ایستیرم ایستیراحت اوچون دریایا گئدم. منه قاییق وئره بیلرسن؟» آغاج جواب وئردی: «منیم گؤوده‌می قاییق دوزلتمگه ایستیفاده ائله. شاید اوزاق دریا سفرینه چیخدین و سعادتلی اولدون !» کیشی قاییق دوزلتمک اوچون آغاجین گؤوده‌سینی کسدی.  کیشی دریا سفرینه چیخدی و اوزون مودته‌دک قاییتمادی. سون واختلار کیشی ایللر سونرا قاییتدی. آغاج اونا دئدی: « اوغلوم من موتأسیفم کی هئچ نه‌ییم یوخدور کی سنه وئرم. حتّا سنه بیر آلما دا وئره بیلمیرم.» کیشی جواب وئردی: «ناراحتچیلیغا یئر یوخدور منده اونو یئمگه دیش یوخدور.» آغاج دئدی: «گؤوده‌م ده یوخدور کی اونا دیرماشاسان.» کیشی جواب وئردی: «ایندی او ایشه بؤیوموشم.» سونرا آغاج گؤز یاشلاری آخا-آخا ایضافه‌لتدی: «دوغرودان دا من سنه بیر شئی وئرمکدن عاجیزم. منده قالان تکجه ریشه‌لریمدیر کی اونلار دا اؤلمکده‌دیرلر !» سونرا کیشی دئدی: «منیم آرتیق بیر شئیه احتیاجیم یوخدور. منیم ایستدیگیم بیر یئردیر کی اوردا راحت اولام. بو قدر ایلی چتینلیق چکمیشم. قوجا آغاجین ریشه‌لری لاپ یاخشی یئردیر کی اونا دایانیب دینجلم.» آغاج دئدی: « گل اوتور یانیمدا و دینجل !» کیشی اوتوردو و آغاج سئوینج گؤز یاشلاری ایچینده گولومسه‌دی. حیکمت: آغاج آتا-آنا کیمیدیر. اوشاق اولاندا اونلارلا اویناماغی سئویریک و بؤیوگندن سونرا اونلاری ترک ائدیریک و بیر شئیه احتیاجیمیز اولمادان قاییتمیریق. و البته شک یئری یوخدور کی آتا-آنا صمیم قلبدن ارزیشلی زادلارینی اوشاقلارینا –کی اونلارین گؤزونده هله‌ده اوشاقدیلار- وئررلر.